د شهیدانو او معلولینو چارو وزارت او د افغانستان د استراتيژیکو مطالعاتو او پالیسۍ (ASPS) مؤسسې ترمنځ د څه باندې (۷۲) میلیونه افغانیو په ارزښت هوکړه لیک لاسلیک شو

د شهیدانو او معلولینو چارو وزارت یتیمانو، کونډو مېرمنو او معلولینو په ژوند کې د لازمو اسانتیاوو رامنځته کولو او د هغوی د اقتصادي ملاتړ په موخه، د افغانستان د استراتيژیکو مطالعاتو او پالیسۍ (ASPS) مؤسسې سره د (۷۲) میلیونه (۶۷۷) زره او (۶۸۰) افغانیو په ارزښت چې معادل یې یو میلیون (۵۵) زره او (۵۹۴) ډالره کېږي د همکارۍ هوکړه لیک لاسلیک کړ.

د همکارۍ دغه هوکړه لیک د دې وزارت د بهرنیو اړیکو، پلان او تقنین چارو رئیس محترم ملا صدوخان حق شناس او د افغانستان د استراتيژیکو مطالعاتو او پالیسۍ (ASPS) مؤسسې رئیس محترم محمد طارق غیرت ترمنځ لاسلیک شو، چې له مخې به یې په کابل، هرات، بامیان او دایکندي ولایتونو کې د شهیدانو او معلولینو له کورنیو څخه (۱۲۰۰) تنو مستحقینو ته د هغوی د اقتصادي پیاوړتیا لپاره د حرفوي زده کړو پروګرامونه په بېلابېلو برخو لکه خیاطي، د موټر سایکل ترمیم، نلدواني، کرنې، د چرګانو ساتنې او نورو اړوندو برخو کې پیل شي.

د یادو پروګرامونوګډونوال به د مسلکي ښوونکو تر لارښوونې لاندې عملي او تیوري زده کړې ترلاسه کړي، د پروګرام له بشپړولو وروسته به اړین وسایل او لوازم ورکړل شي او هغوی به د کوچنیو کاروبارونو پر لاره اچولو سره اقتصادي ځان بسیاینې ته ورسېږي، یاده پروژه به د شهیدانو او معلولینو چارو ریاستونو سره په همغږۍ د (۱۰) میاشتو په موده کې تطبیق شي.

همداراز د دې هوکړه لیک له مخې به د شهیدانو او معلولینو چارو وزارت اړوند (۵۰) تنو کارکوونکو ته د کاري ظرفیت لوړولو په برخو کې هم زده کړې ورکړل شي.

محترم ملا صدوخان حق ‌شناس د هوکړه‌ لیک د لاسلیک پر مهال د مؤسسې له مسؤلینو څخه د شهیدانو ورثه وو او معلولینو ته د پاملرنې له امله مننه او قدرداني وکړه او له هغوی وغوښتل چې د یتیمانو، کونډو او معلولینو د اقتصادي پياوړتیا په برخو کې ورته نورې پروژې هم پیل کړي تر څو هغوی له اقتصادي اړخه په ځان بسیا او د خپل ژوند ستونزې خپله حل کړي.