د ۲۵ برېښنايي ويلچرونو لپاره وړ معلولين وټاکل شول
د ۲۵ برېښنايي ويلچرونو لپاره وړ معلولين وټاکل شول
د شهيدانو او معلولينو چارو وزارت لخوا د ترکیې هيواد په مالي ملاتړ، ۲۵ تنه بشپړ معلوليت لرونکي وګړي د پچې اچونې بهير په ترڅ کې د برېښنايي ويلچرونو لپاره وړ وګڼل شول.
د شرايطو له مخې دغه ويلچرونه هغو معلوليت لرونکو وګړو ته ويشل کېږي، چې يا خو په بشپړ ډول فلج وي او يا يې دواړه پښې له لاسه ورکړې وي.
د شهيدانو او معلولينو چارو وزارت د ملاتړ او خدمتونو وړاندې کوونکې مرستيالې جميلې نورستانۍ د ترکیې هيواد له همکارۍ مننه وکړه او په راتلونکي کې يې په دې برخه کې ترېنه د لا زياتو مرستو او همکاريو غوښتنه وکړه.
د يادونې وړ ده، چې د يادو ويلچرونو لپاره (۴۷) معلوليت لرونکو وګړو نوملیکنه کړې وه؛ (۳۳) تنه يې د وزارت موظفې کميټې له لوري پر شرايطو برابر او مستحق وشمېرل شول، چې د پچه اچونې رڼې پروسې په ترڅ کې يې ۲۵ تنه وړ وګڼل شول او په وروستي پړاو کې به په افغانستان کې د ترکيې هېواد د وظيفوي قوماندانۍ له لوري دغه ويلچرونه پر يادو معلولينو وويشل شي.
