د شهیدانو او معلولینو چارو سرپرست او نوماند وزیر له یوې افغانې څېړونکې سیما غني سره وکتل
د شهیدانو او معلولینو چارو سرپرست او نوماند وزیر، پوهنمل حمیدالله فاروقي له افغانې څېړونکې سیما غني سره وکتل او د شهیدانو وارثینو او معلولیت لرونکو وګړو د ژوند عمومي وضعیت په اړه بحث وکړ.
په دې غونډه کې، ښاغلي فاروقي د شهیدانو وارثینو او معلولیت لرونکو وګړو د ژوند بېلابېلو برخو ته اشاره وکړه او ویې ویل چې د شهیدانو او معلولینو وزارت هڅه کوي په هېواد کې د جنګي وضعیت او محدودو سرچینو به پام کې نیولو سره د وزارت د خدماتو او فعالیتونو اغېزمنتیا لوړه کړي.
ښاغلي فاروقي یادونه وکړه چې وزارت سږ کال له فساد سره د مبارزې او د روڼتیا لپاره سخت کار کړی دی. هغه زیاته کړه چې د تدقیق او د اسنادونو د څېړنې کمیټې اوس په مرکز او ولایتونو کې فعالې دي او پاک اسناد له ناپاکو څخه جلا کولو کې بوخت دي، او د تادیې له پروسې څخه یو شمېر پېژندل شوي اسناد حذف شوي دي.
د شهیدانو او معلولینو چارو سرپرست او نوماند وزیر یادونه وکړه چې د وزارت دنده یوازې د معاشونو ورکول نه دي بلکه مستقیم او غیر مستقیم خدمات هم وړاندې کوي لکه د خوراکي او غیر خوراکي توکو د مرستو وېش، بیارغونه، روغتیایي او بیارغونې خدمات، ټولنیز ادغام، د اوسېدو ځای برابرول، د حرفوي او مسلکي زدهکړو زمینه برابرول، کارموندنه او نور موضوعات هم دي.
د غونډې په لړ کې، د شهیدانو او معلولینو چارو وزارت سرپرست او نوماند وزیر ښاغلی فاروقي ټینګار وکړ چې د شهیدانو وارثینو او معلولیت لرونکو وګړو ته د نړیوالې ټولنې مرستې خورا لږې او کافي نه دي. هیله څرګنده کړه چې دا مرستې به زیاتې شي او هیله یې څرګنده کړه چې د هېواد له له حالت سره به دا مرستې به زیاتې شی او د دې مرستې په سمه توګه اداره کولو او د اغېزمنتیا د لوړولو لپاره به هڅې وشي.
