د شهيدانو او معلولينو چارو وزارت رهبري هيئت ناسته وشوه
د شهيدانو او معلولينو چارو وزارت رهبري هيئت ناسته وشوه
د شهيدانو او معلولينو چارو وزارت رهبري هئيت د شهيدانو ورثې او معلوليت لرونکو وګړو د ۱۴۰۰ ھ لمريز کال د حقونو د ورکړې بهير کې د چټکتيا او روڼتيا رامنځته کولو په موخه ناسته ترسره کړه.
په پيل کې د شهيدانو او معلولينو چارو سرپرست وزير پوهنمل حميدالله فاروقي د اسنادو او وثيقو د ارزونې، له اړونده ادارو سره د همغږۍ په رامنځته کولو، بوديجې او د وزارت تشکيلاتو په تړاو يې خبرې وکړې او د ياد قشر ستونزو ته رسيدنه يې خپل کاري لومړيتوب وګاڼه.
د ناستې نورو ګډونوالو هم د معلولينو (م۱۱) فورم کې د ستونزو، د نظامي شهيدانو ورثې ته د حقونو د ورکړې پر څرنګوالي، د معلولينو د اسنادو کتنې او ارزونې کميټو پر زياتولو او طبيعي معلولينو ته د ډيجيټلي کارتونو د ويش په هکله يې خبرې وکړې او د شته ستونزو د هواري لپاره يې د نظرونو تبادله وکړه.
دوی د هېواد له نافذه قوانينو او تګلارو سره سم په کاري پروسو کې د اسانيو راوستل او د سيسټم ډيجيټلي کول يې جدي اړتيا وګڼله او د خدمتونو وړاندې کولو په ډول کې د مثبت بدلون غوښتوونکي شول.
د ناستې په پای کې پرېکړه وشوه، چې د اسنادو کتنې او ارزونې پروسې د چټکتيا لپاره بايد له اړونده ادارو سره همغږي زياته شي او د حقونو د ورکړې پروسې د اسانه کولو لپاره يو هئيت هم وټاکل شو، څو په دې تړاو مشخصه طرحه جوړه او د پلې کيدو په پار يې د وزارت له مشرتابه سره شريکه کړي.
