د شهیدانو او معلولینو چارو وزارت کارکوونکو ته د نوي برېښنائي سیسټم د محاسبې او تأدیاتو برخو روزنیز ورکشاپ پیل شو
د شهیدانو او معلولینو چارو وزارت د ډېټابېس او معلوماتو د سیسټم ریاست کارکوونکو لپاره د ظرفیت لوړولو او د نوي برېښنايي سیسټم د محاسبې او تأدیاتو د برخو د مؤثر تطبیق په موخه روزنیز ورکشاپ پیل شو.
یاد ورکشاپ د دې ریاست د رئیس محترم ملا رحمت الله خالد، تر څارنې لاندې د اتو تنو کارکوونکو په ګډون ترسره کېږي، چې اساسي موخه یې د کارکوونکو د تخنیکي مهارتونو پیاوړتیا او د نوي برېښنايي سیسټم د محاسبې او تأدیاتو اړوند برخو د سمې کارونې په اړه د عملي لارښوونو وړاندې کول دي.
په دې روزنیز ورکشاپ کې به ګډونوال د یاد برېښنايي سیسټم د محاسبې او تأدیاتو اړوند برخو له تخنیکي او عملي اړخونو سره په بشپړه توګه اشنا شي، تر څو وکولای شي د ۱۴۰۵ مالي کال په جریان کې د همدې سیسټم له لارې د مساعدتونو حوالې په اغېزمن، دقیق او معیاري ډول ترسره کړي.
د یادونې وړ ده چې دا ډول روزنیز پروګرامونه د اداري چارو د لا ښه تنظیم، د کاري بهیر د چټکتیا، د کارکوونکو د مسلکي وړتیاوو د لوړولو او د برېښنايي سیسټمونو د بریالي او اغېزمن تطبیق لپاره مهم او ګټور بلل کېږي.
