د شهیدانو او معلولینو چارو وزارت مسلکي او تخنیکي چارو مرستیال محترم الحاج ملا عبدالرزاق آخند، په افغانستان کې د خوړو نړیوال پروګرام (WFP) له مرستیال سره وکتل
د شهیدانو او معلولینو چارو وزارت مسلکي او تخنیکي چارو مرستیال محترم الحاج ملا عبدالرزاق آخند، په افغانستان کې د خوړو نړیوال پروګرام (WFP) له مرستیال محترم هرالډ میناردټ سره په خپل کاري دفتر کې وکتل، په دې کتنه کې د دې وزارت د دفتر رئیس محترم قاري شاه محمد دوست، د بهرنېو اړیکو او پلان رئیس محترم ملا صدوخان حق شناس، په افغانستان کې د خوړو نړېوال پروګرام ارتباطي مسؤل محترم حمیدالله افغان او د خوړو نړېوال پروګرام د اضطراري برخې مسؤل محترم خالد نورزاد حضور درلود.
په پېل کې محترم الحاج ملا عبدالرزاق آخند د یتیمانو، کونډو او معلولینو په وړاندې پرتو ستونزو او ننګونو ته اشاره وکړه او یې ویل: په دې هېواد کې د نورو هېوادونو په پرتله ډیری خلک بشري مرستو ته اړتیا لري او د دې لامل دا دې چې په تېرو څو لسیزو کې افغانانو ملت ته د خدمت کولو او د هېواد د خپلواکۍ په لاره کې ډیرې قرباني ورکړې دي او نن ورځ هغوی له مالي اړخه کمزوري پاتې دي او په کار ده چې هغوی ته د مرستو رسولو زمینه برابره او په سمه توګه د هغوی لاسنیوی وشي.
د مسلکي او تخنیکي چارو مرستیال په اسلامي امارت کې د ښځینه ؤ حقوقو ته د ځانګړې پاملرنې یادونه وکړه او زیاته یې کړه: د اسلامي امارت د رامنځته کیدو یوه اساسي موخه هم له شرعي او انساني اړخه د ښځینو د حقوقو څخه دفاع او د هغوی د عزت او شرافت ساتل وو، او کومې ناروا کړنۍ او ظلمونه چې د ښځو په وړاندې کیدل، د ظلمونو څخه ښځو ته نجات ورکړل شول.
محترم الحاج ملا عبدالرزاق آخند د خوړو نړېوال پروګرام له مرستو څخه مننه وکړه او ویې ویل: د شهیدانو او معلولینو چارو وزارت په هېواد کې له شپږ لکه څخه زیاتو یتیمانو، کونډو او معلولینو ته میاشتنې نغدي مرستې ورکوي، او دا به غوره وي چې د خوړو نړېوال پروګرام له دې وزارت سره په همغږۍ یادو کسانو ته چې د ټولنې تر ټولو اړمن قشر دې هغوی ته لومړیتوب ورکړي او په دې ډول به د هغوی پر وړاندې شته ستونزې له منځه یوړل شي او مرستې به واقعي مستحقینو ته ورکړل شي.
په دې کتنه کې په افغانستان کې د خوړو نړیوال پروګرام (WFP) مرستیال محترم هرالډ میناردټ د دې پروګرام په موخو، فعالیتونو او لاسته راوړنو په هکله هر اړخیز معلومات وړاندې کړل او زیاته یې کړه: د خوړو نړېوال پروګرام یواځیني او اساسي موخه دا ده چې د نړې په سطح آسیب پذیره او اړمنو خلکو ته په اضطراري حالاتو کې بشري مرستې ورسوي او هغوی لپاره غذایي امنیت او مصؤنیت رامنځته کړي.
هغه همداراز وویل: د خوړو نړیوال پروګرام په پام کې لري چې په روان کال کې به شپږ میلیونه کسانو ته د دوبي په موسم کې او یوولس میلیونه نورو اړمنو خلکو ته د ژمې په موسم کې بشري مرستې چمتو کړي نوموړي زیاته کړه: یاد پروګرام معلولینو او بی سرپرسته کورنېو ته د مرستو په رسولو کې لومړیتوب ورکوي او د دې وزارت سره په همغږۍ مستحقو یتیمانو، کونډو او معلولینو د مرستو په رسولو پوره پاملرنه وشي.
د دې کتنې پر مهال د شهیدانو او معلولینو چارو وزارت د دفتر رئیس محترم قاري شاه محمد دوست یتیمانو، کونډو او معلولینو ته په ښه او شفافه توګه د مرستو د رسولو په څرنګوالي خبرې وکړې او زیاته یې کړه: په هېواد کې د اسلامي امارت په راتګ سره دې وزارت پرته له هر ډول تبعیض څخه د یوې شفافې پروسې په ترڅ کې د اسلامي امارت، د تېرې ادارې د وژل شویو نظامیانو او ملکي یتیمان، کونډې او معلولین ثبت کړې دي. هغه د خوړو نړېوال پروګرام له مسؤلینو څخه وغوښتل ترڅو خپلې مرستې د دې وزارت سره په همغږۍ ترسره کړي.
همداراز د دې وزارت د بهرنېو اړیکو او پلان رئيس محترم ملا صدوخان حق شناس یتیمانو او معلولینو د اقتصادي ځان بساینې په برخه کې د حرفوي پروګرامونو د دایرولو په اهمیت خبرې وکړې او د خوړو نړېوال پروګرام له مسؤلینو یې وغوښتل تر څو په یاده برخه کې هم دې وزارت سره همکاري وکړي.
