د شهیدانو او معلولینو چارو سرپرست وزیر پوهنمل حمیدالله فاروقي د جمهور رییس لومړی مرستیال سره وکتل
د شهیدانو او معلولینو چارو سرپرست وزیر پوهنمل حمیدالله فاروقي د جمهور رییس لومړی مرستیال سره وکتل
د ناستې په پیل کې ښاغلي فاروقي د شهیدانو ورثې او معلولیت لرونکو وګړو ته د ځانګړې پاملرنې له امله جلالتمآب امرالله صالح له همکاریو مننه وکړه.
ښاغلي فاروقي له جلالتمآب ولسمشر سره د شهیدانو د وارثینو او معلولیت لرونکو وګړو د ناستې په اړه معلومات وړاندې کړ ویې ویل: د شهیدانو وارثینو او معلولیت لرونکو وګړو په شپږو کاري کمیټو کې له ګروپي کار وروسته خپلې ستونزې او غوښتنې جلالتمآب ولسمشر ته وړاندې کړې. ښاغلي فاروقي وویل: له فساد څخه د مخنیوي او د خدمتونو د چټکتیا په موخه د برېښنایي سیستم تطبیق لپاره پلانونه جوړ شوي، د الیکترونیکي تذکرو ویش په چټکه توګه دوام لري او د اسنادونو د څیړنې پروسه هم تر ډیره تکمیل شوی.
ښاغلي فاروقي زیاته کړه: د تحصیلي بورسیو ورکړه، کارموندنه، ظرفیت لوړونه، د معلولیت لرونکو وګړو په ټولنه کې ادغام او له نړیوالو مرستندویه بنسټونو سره د همکاریو لپاره اساسي ګامونه پورته شوي. د معلولینو د لس کلنې ملي ستراتیژي مسوده نهايي او د تطبیق لپاره يې د عمل پلان جوړ شوی، د حقوقو او امتیازاتو قانون د تعدیل طرحه عدليي وزارت ته لېږل شوې او د معلولیت لرونکو ملي فدراسیون لپاره د ټولو مدني بنسټونو تر مینځ همغږي رامینځته شوې ده.
ښاغلي فاروقي د خبرو په ترڅ کې د وزارت بودیجوي او تشکیلاتي ستونزې جلالتمآب امرالله صالح سره شریکې کړې او هیله یې څرګنده کړه چې د ستونزو د حل په موخه د یادې ادارې ملاتړ وکړي.
د جمهور رییس لومړی مرستیال جلالتمآب امرالله صالح د ښاغلي فاروقي ګمارنه نیک او پرځای ګام وباله وویل، د شهیدانو کورنۍ او معلولیت لرونکي وګړي ددې هیواد د عزت او وقار ساتونکي دي، زموږ دنده ده چې د یاد قشر د ملاتړ په موخه بنسټیز پلانونه جوړ او تطبیق کړو. جلالتمآب امرالله صالح زیاته کړه، په ټولو ادارو کې د شهیدانو او معلولینو د حقوقو او امتیازاتو د قانون تطبیق، د ادارو تر منځ همغږۍ او خدمتونو وړاندې کولو کې د برېښنایي سیستمونو څخه ګټه اخیستنه اړینه ده.
جلالتمآب امرالله صالح وویل، د ادارې د پرمختګ او د یاد قشر ستونزو ته د رسیدګي په موخه له دولتي ادارو او نړیوالو بنسټونو سره کاري ناستې به پیل شي.
جلالتمآب امرالله صالح د شهیدانو وارثینو او معلولیت لرونکو وګړو ستونزو ته د رسیدنې په موخه د هر راز همکاریو ژمنه وکړه.
