د شهیدانو او معلولینو چارو وزارت او د همدرد خیریه مؤسسې ترمنځ د هوکړه لیک لاسلیک
د شهیدانو او معلولینو چارو وزارت د یتیمانو او کونډو د ملاتړ او لاسنیوي په موخه د همدرد خیریه مؤسسې سره د (۴۵) زره او (۱۰۰) ډالرو په ارزښت د همکارۍ هوکړه لیک لاسلیک کړ.
د دې هوکړه لیک له مخې، په کندهار او هلمند ولایتونو کې (۱۱۲۵) تنو مستحقو یتیمانو او کونډو ته مرستې ووېشل شي.
چې له دې جملې څخه به (۳۰۰) تنو کونډو ته (۱۱) ډوله بېلابېل خوراکي او غیر خوراکي توکي او همداراز (۸۲۵) تنو یتیمانو سره به د اختریزو توکو مرستې ترسره شي.
یاد هوکړه لیک د شهيدانو او معلولينو چارو وزارت د بهرنيو اړيکو، پلان او تقنين چارو رئيس محترم مولوي ثناء الله فرقاني او د همدرد خیریه مؤسسې رئيس محترم مختار احمد کاکړ ترمنځ لاسليک شو.
محترم مولوي ثناء الله فرقاني د يتيمانو د ملاتړ په برخه کې د همدرد خیریه مؤسسې له مرستو څخه مننه وکړه او د يادې مؤسسې له رئيس څخه يې غوښتنه وکړه چې خپلې مرستې لا پراخې کړي، تر څو زيات شمېر يتيمان او معلولین د دې مؤسسې تر پوښښ لاندې راشي او له دوامداره ملاتړ څخه برخمن شي.
