د شهیدانو او معلولینو چارو وزارت او د (IHH) مؤسسې ترمنځ د هوکړه لیک لاسلیک

د شهیدانو او معلولینو چارو وزارت د پلان، بهرنېو اړیکو او تقنین ریاست او د (IHH) خیریه مؤسسې ترمنځ هوکړه لیک لاسلیک شو چې موخه یې د یتیمانو لپاره د ښه ژوند فرصتونو برابرول او د هغوی اقتصادي پیاوړتیا ده. د دې هوکړه لیک له مخې به، په کندهار ولایت کې (۲۵) تنو یتیمانو ته د بار وړونکو زرنج نقلیه وسایطو وېش ترسره او په دې سره به یتیمان له اقتصادي اړخه په ځان بسیا شي.

یاد هوکړه لیک د (۳۷) زره او (۸۰۰) ډالرو په مجموعي ارزښت د پلان، بهرنیو اړیکو او تقنین رئیس محترم ملا صدوخان حق شناس او د (IHH) مؤسسې مرستیال محترم شهاب الدین ثاقب ترمنځ لاسلیک شو او د کندهار ولایت د شهیدانو او معلولینو چارو ریاست سره په همغږۍ به د دوو (۲) میاشتو په موده کې پلي شي.

د دې هوکړه لیک د لاسلیک پر مهال محترم ملا صدوخان حق شناس د مؤسسې له مرستیال څخه یې مننه وکړه او له هغه یې وغوښتل چې د یتیمانو، کونډو مېرمنو او معلولینو لپاره په بېلابېلو برخو کې لا زیاتې مرستې برابرې کړي تر څو د دې اړمن قشر ستونزو ته په ښه توګه رسیدګي وشي.