د شهیدانو شپږ سوه زره ورثې او معلولیت لرونکو وګړو ته ځانګړي سیمکارتونه وېشل کېږي
د شهیدانو شپږ سوه زره ورثې او معلولیت لرونکو وګړو ته ځانګړي سیمکارتونه وېشل کېږي
د شهیدانو او معلولینو چارو سرپرست وزیر پوهنمل حمید الله فاروقي د مخابراتي خدمتونو د تنظیم ادارې (اترا) مالي او اداري معین یونس سادات سره وکتل.
په پیل کې ښاغلي فاروقي د خدمتونو په برېښنایي کولو او د شهیدانو او معلولینو چارو وزارت سره د شهیدانو د ورثې او معلولینو د وصلولو په اړه خبرې وکړې او د نوي برېښنایي سیستم تطبیق یې د خپلو کارونو لومړیتوب وګڼه. ښاغلي فاروقي وویل: د ایم ټي این مخابراتي شرکت کارپورېټ سیمکارتونه د ځانګړو مکالماتي اسانتیاوو او چټګ انټرنېټ لرونکي دي، چې د شهیدانو او معلولینو چارو وزارت او یاد مخابراتي شرکت تر منځ د یوه هوکړه لیک له لاسلیک وروسته به په ټول هېواد کې ووېشل شي. ښاغلي فاروقي د دې پروسې په مدیریت کې د اترا ادارې ملاتړ اړین وګڼه او د همکارۍ غوښتنه یې وکړه.
د اترا ادارې مالي او اداري معین ښاغلي یونس سادات د خدمتونو د برېښنایي کولو برنامې په اړه خوښي وښوده او ژمنه یې وکړه چې اترا اداره تخنیکي ملاتړ ته چمتو ده. ښاغلي سادات وویل: د مخابراتي خدمتونو د تنظیم اداره به د یادو سیمکارتونو د وېش بهیر کې تخنیکي ملاتړ وکړي. ژمنه یې وکړه، چې د برېښنایي کولو پروژو په تطبیق کې به هم همکاري وکړي.
