د شهیدانو او معلولینو په چارو کې د دولت وزارت د رهبرۍ غونډه وشوه
د شهیدانو او معلولینو په چارو کې د دولت وزارت د رهبرۍ غونډه وشوه
نن پنجشنبه د (جوزا میاشتې ۲۲ نېټه) د شهیدانو او معلولینو په چارو کې د دولت وزارت د رهبرۍ غونډه د شهیدانو او معلولینو په چارو کې د دولت د وزیر ښاغلي لعل الدین آریوبي په مشرۍ ترسره شوه، چې د وزارت مرستیالانو، رییسانو، مشاورینو او نورو مسولینو پکې ګډون درلود.
ښاغلي آریوبي د شهیدانو ورثې او معلولیت لرونکو وګړو ته د حقوقو ورکړې بهیر سربېره د قوانینو د تعدیلاتو، سیستمونو د تطبیق، دولتي ادارو سره د هوکړه لیکونو د تعقیب، د معلولینو پر ملي فدراسیون، معلولینو د ملي انستیتیوت فعالولو او پر ځینو نورو تخنیکي مسایلو بحث وکړ.
ښاغلي آریوبي وویل، چې د قوانینو د تعدیل ټول موارد باید په ټولیزه توګه وڅېړل شي او له تقنین او تصویب وړاندې دې ټولې ستونزې په دقیق ډول اصلاح شي، تر څو د قوانینو ټولې نیمګړتیاوې حل شي.
ښاغلي آریوبي د سیستم د تطبیق مسولینو ته لارښوونه وکړه، چې ټول نظامي او ملکي شهیدان او معلولین د یوه منظم پلان پر بنسټ سیستم کې داخل او بشپړه رونتیا تامین شي. د سیستم مسولینو وویل، چې په دې اړه عملاً کار پیل شوی او تر اوسه د (۶۰۰۰) شهیدانو اسناد سیستم ته پورته شوي دي او په راتلونکو اونیو کې به دا بهیر نور هم چټک کړي.
ښاغلي آریوبي په (۳۱) ولایتونو کې د برېښنایي تذکرو د وېش بهیر کې د معلولینو او د شهیدانو ورثې ته لومړیتوب ورکول اړین وګڼل زیاته یې کړه، چې یاد فرصت په سمه توګه مدیریت او ستونزو ته یې پر وخت رسیدګي وشي. د معلولینو د ملي فدراسیون د نهایي اساسنامې او کړنلارې په اړه یې لارښوونه وکړه، چې تطبیق لپاره یې اړوندو ادارو سره د همغږۍ په موخه مجالس ترسره شي.
ښاغلي آریوبي د معلولینو او شهیدانو د ورثې اړوند دولتي ادارو او خصوصي پوهنتونو سره د لاسلیک شویو دوه اړخیزو هوکړه لیکونو د تعقیب او د ترسره شویو اجرااتو او په دولتي ادارو کې د معلولینو د ۳ سلنه ګمارنې د تطبیق په اړه د راپور د ترتیب لارښوونه وکړه.
د یادو مسایلو تر څنګ په ولایتونو کې د اسایشګاوو پر جوړولو، عزیزي بانک د نویو کارتونو وېش بهیر په چټکېدو، د ذکات صندوق طرحې په پراختیا، معلولینو د ملي انستیتوت فعالولو، مرکز او ولایتونو کې د اسنادو د بررسۍ، جندر پالیسۍ او نورو بنسټیزو موضوعاتو مفصل بحث ترسره او لارښوونه وشوه، چې د معلولینو او شهیدانو د ورثې اړوند ټولې چارې باید په جدي توګه تعقیب او له ځنډ پرته اقدامات ترسره شي.
