په کابل کې د شهر دبۍ پر هوټل د تروریستي پېښې د شهیدانو د وارثینو او معلولینو د ثبت پروسه پیل شوه
د شهر دوبۍ هوټل د انتحاري حملې د شهیدانو وارثین او معلولین د حقوقو ورکړې کتابچو لپاره ثبت شوه
د شهیدانو او معلولینو په چارو کې د دولت وزارت له لوري د شهر دوبۍ هوټل د وروستۍ تروریستي پېښې د شهیدانو وارثینو او معلولینو ته د حقوقو ورکړې کتابچو او ثبت لړۍ نن رسماً پیل کړه.
دا لړۍ د جلالتماب جمهور رییس په لارښوونه او د شهیدانو او معلولینو په چارو کې د دولت وزیر ښاغلي لعل الدین آریوبي په حضور کې د دې وزارت په تالار کې پیل شوې او تمه ده، چې د یادې پېښې ۸۷ د شهیدانو وارثین له وزارت سره ثبت او د خپلو حقوقو کتابچې ترلاسه کړي.
دا پروسه د شهیدانو او معلولینو په چارو کې د دولت وزارت له کړیو ژمنو څخه ده او د شهیدانو کورنیو او معلولیت لرونکو وګړو ستونزو ته رسیدګي خپل مسولیت ګڼي.
دا وزارت همېشه او د هېواد په هر ګوټ کې په دې هڅه کې دی، چې د یاد قشر ستونزو ته په چټکه توګه رسیدګي وکړي او دا چاره خپله ملي او انساني وجیبه ګڼي.
د یادونې وړ ده، چې دا خونړۍ پېښه د زمري میاشتې په ۲۶ نېټه د کابل ولایت په شهر دوبۍ هوټل کې د واده په مراسمو کې وشوه، چې زموږ ګڼ شمېر بې ګناه هېوادوال یې شهیدان او ټپیان کړل.
