د معلولیت لرونکو وګړو د نړیوالې ورځې د نمانځنې په اړه د مسوولو ادارو د نقش پر څرنګوالي غونډه وشوه
د معلولیت لرونکو وګړو د نړیوالې ورځې د نمانځنې په اړه د مسوولو ادارو د نقش پر څرنګوالي غونډه وشوه
د شهیدانو او معلولینو په چارو کې د دولت وزیر لعل الدین آریوبي د جمهور رییس له لوري د معلولیت لرونکو وګړو د نړیوالې ورځې د نمانځنې په اړه د ټاکل شویو ادارو مسولینو سره وکتل او د یادې ورځې د ترسراوي پر څرنګوالي یې خبرې وکړې.
د معلولیت لرونکو وګړو د نړیوالې ورځې (ډسمبر ۳) د نمانځنې لپاره د شهیدانو او معلولینو په چارو کې د دولت وزارت سربېره د معلولینو په چارو کې د جمهور رییس د سلاکار دفتر، ملي امنیت شورا، د جمهوري ریاست د چارو ادارې او تخنیکي او مسلکي زده کړو ادارې ته مسولیت سپارل شوی دی.
ښاغلي آریوبي وویل، چې سږ کال به دغه ورځ له نورو کلونو په متفاوته توګه د ملي سمپوزیم په بڼه ونمانځل شي او د معلولیت لرونکو وګړو د ملاتړ لپاره به د ملي او نړیوالو مرستندویه بنسټونو د همکارۍ د جلبولو او ژمنتیا اخیستلو لپاره ترې د یوه مهم فرصت په توګه ګټه پورته کړي. ښاغلي آریوبي زیاته کړه، چې د یادې ورځې د نمانځلو پر مهال به د معلولیت لس کلنه ملي ستراتېژي هم په رسمي ډول پیل شي. ښاغلي آریوبي تاکید وکړ، چې د دې ورځې د غوره نمانځنې او د مطلوبو پایلو ترلاسه کولو په موخه باید ټولې اړوندې ادارې خپل ټاکل شوي مسولیتونه به ښه ډول ترسره کړي.
د جمهور رییس سلاکار عمرا خان منیب هم د ملي سمپوزیم په بڼه د یادې ورځې نمانځل بې ساری اقدام وباله او د یوې سترې موخې په توګه یې د دې ورځې پر نمانځلو د ټینګار تر څنګ خپل نظریات هم شریک کړل.
د یادو ادارو مسولینو هم د دې ورځې د نمانځنې په اړه خپل نظرونه او وړاندیزونه د وزارت له رهبرۍ سره شریک او د هر اړخیزې همکارۍ او همغږۍ په لرلو یې ټینګار وکړ.
