د شهیدانو او معلولینو چارو وزارت د رهبرۍ شورا غونډه تر سره شوه
د شهیدانو او معلولینو چارو وزارت د رهبرۍ شورا غونډه د ښاغلي شیخ عبدالحکیم د یاد وزارت د خدمتونو د وړاندې کولو او ملاتړ معین په مشرۍ، او د اړوندو ریاستونو د رییسانو په شتون کې ترسره شوه.
په دې ناسته کې شیخ عبدالحکیم په هغو ولایتونو کې چې د معلولیت لرونکو وګړو د نوم لیکنې بهیر بشپړ شوی، د یتیمانو د نوم لیکنې د بهیر د پیل کولو خبر ورکړ او زیاته یې کړه چې په راتلونکو څو ورځو کې به دغه بهیر پیل شي.
ښاغلي شیخ عبدالحکیم همداراز د شهیدانو او معلولینو چارو وزارت سره د بېلابېلو مرستندویه بنسټونو د مرستو د وېش په رونټیا او د شهیدانو او معلولینو چارو وزارت سره د مرستو په همغږۍ او د ویش منظمې او شفافې پروسې د رامنځته کولو او همدا راز پر مستحقو کسانو د مرستو د وېش پر شفافیت او رونټیا ټینګار وکړ.
نوموړي دغه راز د( فلج) وګړو او معلولیت لرونکو یتیمانو سره د مرستې او د استوګنځي د برابرلو او د هغوې د ښې پالنې او ښو خدماتو وړاندې کولو او هوسا ژوند په موخه د کړنلارې جوړونې يوه کمېټه هم رامنځته کړه.
ښاغلي شیخ عبدالحکیم زياته يې کړه، چې د هېواد په بېلابېلو ولايتونو کې به داسې مرکزونه جوړ کړي، چې (فلج) وګړي او بې سرپرسته معلولیت لرونکي يتيمان به په کې استوګن وي او د حرفوي، او مسلکي مهارتونه د زده کړې زمینه به ورته برابره شي.
