د شهيدانو او معلولينو چارو سرپرست وزير د امنيتي او دفاعي ارګانونو له استازو سره د حقونو د چټکې ورکړې د څرنګوالي په تړاو ناسته وکړه
د شهيدانو او معلولينو چارو سرپرست وزير د امنيتي او دفاعي ارګانونو له استازو سره د حقونو د چټکې ورکړې د څرنګوالي په تړاو ناسته وکړه
نن دوشنبه د وري په ۳۰مه، د شهيدانو او معلولينو چارو سرپرست وزير پوهنمل حميدالله فاروقي، د نظامي شهيدانو او معلولينو د حقونو د چټکې ورکړې د څرنګوالي په موخه د کورنيو، دفاع چارو وزارتونو او ملي امنيت رياست له استازو سره وکتل او په دې تړاو يې پر مهمو مسايلو بحث وکړ.
د نظامي شهيدانو او معلوليت لرونکو وګړو لپاره د (۱۴۰۰) ھ لمريز کال او پاتې نورو کلونو د حقونو د ورکړې، د اسنادو او وثيقو کتنه او ارزونه، د پاکو اسنادو څخه د ناپاکو جلا کول، د روڼتيا ټينګښت، د قانون تعديل او د اړوندو ادارو ترمنځ د همکارۍ او همغږۍ زياتوالی د ناستې مهم ټکي وو.
د دفاعي او امنيتي ارګانونو استازو د نظامي شهيدانو او معلولينو اسنادو کې د روڼتيا د ټينګښت په تړاو د شهيدانو او معلولينو چارو وزارت مشرتابه سره خپلې مشورې، وړانديزونه او غوښتنې شريکې کړې او د خپلو ادارو له اړخه يې د هر ډول همکاريو، ګډکار او همغږيو زياتوالي ژمنې تازه کړې.
د شهيدانو او معلولينو چارو وزير پوهنمل حميدالله فاروقي د امنيتي او دفاعي ارګانونو له اړخه د وزارت سره د هميشنيو همکاريو او ګډکار له امله مننه وکړه او د همغږۍ په لا زياتوالي يې ټينګار وکړ.
ښاغلي فاروقي وويل: چې د اصلاحاتو راوستل او په چارو کې د روڼتيا تينګښت د اړونده ادارو ګډ مسوليت دی؛ نو پر همدې بنسټ بايد کوښښ وکړو، چې د شهيدانو ورثې او معلوليت لرونکي وګړي ژر تر ژره د اسنادو ارزونې او کتنې پروسه بشپړه کړي، بايومتريک وکړي او برېښنايي پيژندپاڼې ترلاسه کړي، څو ورته حقوق او معاشونه حواله شي.
ښاغلي فاروقي څرګنده کړه، چې د امنيتي او دفاعي ارګانونو استازو مشورو او وړانديزونو ته په کتو، د روڼتيا ټينګښت ته په پام او د اسنادو د کتنې او ارزونې کميسيون په همغږۍ بايد په قانوني ډول په ګډه يو تصميم ونيول شي، چې د نظامي شهيدانو ورثې او معلولينو لپاره د سږ کال حقوق په چټکه توګه ورکړل شي او د ملکي شهيدانو او معلولينو په شمول د تېرو کلونو حقوق هم د اسنادو تر ارزونې او تکميل وروسته حواله شي.
