د شهیدانو او معلولینو چارو وزارت د څارنې او ارزونې ریاست لپاره نوی رئیس معرفي شو
د افغانستان اسلامي امارت د ریاست الوزراء عالي مقام د حکم پر اساس او د شهیدانو او معلولینو چارو وزارت د لزوم دید او وړاندیز له مخې محترم مولوي نورالحق حقاني د څارنې او ارزونې ریاست د نوي رئیس په توګه، د شهیدانو او معلولینو چارو وزارت مرستیال محترم شیخ صاحب عبدالحکیم حقاني له لوري د یوې غونډې په ترڅ کې کارکوونکو ته معرفي او خپلې چارې يې رسماْ پيل کړې.
د څارنې او ارزونې ریاست د نوي رئيس په معرفي غونډه کې، د شهیدانو او معلولینو چارو وزارت مرستیال محترم شیخ صاحب عبدالحکیم حقاني، د مقام د دفتر رئیس محترم مولوي شاه محمد دوست، د بهرنیو اړیکو، پلان او تقنین چارو رئیس محترم مولوي ثناء الله فرقاني، د کابل ولایت د شهیدانو او معلولینو چارو رئیس محترم ملا شیر محمد صمیم، د نشراتو آمر محترم حافظ محمد یعقوب روښان، د سوانحو او ارزونې آمر محترم کریم الله فاروقي او د یاد ریاست کارکوونکو شتون درلود.
محترم شیخ صاحب عبدالحکیم حقاني په نظام کې بدلون او تبديل يوه مهمه اړتیا وبلله او زیاته یې کړه چې دا بدلونونه د رهبرۍ د لزوم دید او اړتیا له مخې ترسره کېږي او موخه یې د نظام پياوړتيا او د کارونو ښه والی دی.
د شهیدانو او معلولینو چارو وزارت مرستیال د محترم مولوي نورالحق حقاني له تېرو کړنو ستاينه وکړه او د هغه هڅې يې اغېزمنې وبللې او کارکوونکو ته يې سپارښتنه وکړه چې ورسپارل شوې دندې باید په اخلاص، همغږۍ او پوره ژمنتیا سره ترسره کړي.
محترم شيخ صاحب د يتيمانو، کونډو او معلولينو خدمت يو ستر مسؤلیت وباله او زياته يې کړه: موږ د يو داسې قشر خدمت ته مسؤل يو چې خورا اړمن دي، او د دې خلکو د خير دعاګانې د ټولو کارکوونکو او ادارې لپاره ستر نعمت ګڼل کېږي او باید بشپړه هڅه وکړو چې د دوی له خير دعاګانو څخه برخمن شو.
همداراز د شهیدانو او معلولینو چارو مرستیال محترم شیخ صاحب عبدالحکیم حقاني د څارنې او ارزونې له نوي رئيس څخه وغوښتل چې پر وخت پابند او خپلې دندې په دقت سره ترسره کړي. او یادونه یې وکړه چې ټول مسؤلين د الله تعالی جل جلاله په وړاندې په يو ستر امتحان کې واقع دي، نو اړينه ده چې هر څوک خپلې ورسپارل شوې دندې په دقت او اخلاص سره سرته ورسوي، تر څو هم د الله تعالی جل جلاله رضا ترلاسه شي او هم خلکو ته ښه خدمتونه وړاندې شي.
