د شهیدانو او معلولینو چارو وزارت او ژوند د هوساینې او پرمختګ (LRD) مؤسسې ترمنځ د همکارۍ هوکړه لیک لاسلیک شو
د شهیدانو او معلولینو چارو وزارت د یتیمانو د لاسنیوي او ملاتړ په موخه، ژوند د هوساینې او پرمختګ(LRD) مؤسسې سره د همکارۍ هوکړه لیک لاسلیک کړ.
یاد هوکړه لیک د (۲۴) زره او (۴۶۵) ډالرو په ارزښت د دې وزارت د بهرنيو اړیکو، پلان او تقنین چارو رئیس محترم مولوي ثناء الله فرقاني او ژوند د هوساینې او پرمختګ (LRD) مؤسسې مرستیال محترم عبدالله طوفان ترمنځ لاسلیک شو، چې پر اساس به یې په لغمان او ننګرهار ولایتونو کې (۲۳۰) تنو مستحقو یتیمانو لپاره (۱۱) ډوله بېلابېل خوراکي او غیر خوراکي توکي چمتو او ووېشل شي.
محترم مولوي ثناء الله فرقاني یتیمانو ته د مرستو د چمتو کولو په پار د یادې خیریه مؤسسې له مسؤل څخه مننه وکړه او له هغه یې وغوښتل چې د ټولنې د دې اړمن قشر لپاره لازیاتې مرستې برابرې او د هغوی لاسنیوی وکړي.
د یادونې وړ ده چې یاده پروژه د یوې میاشتې په موده کې د لغمان او ننګرهار ولایتونو د شهیدانو او معلولینو چارو ریاستونو سره په همغږۍ به پلې شي.
