د پکتیا ولایت د شهیدانو او معلولینو چارو رئیس د دې ولایت په محبس کې له معلول بندیانو سره وکتل
د پکتیا ولایت د شهیدانو او معلولینو چارو رئیس محترم مولوي محمد نبي محمدي او ورسره مل پلاوی د دې ولایت محبس ته د معلول بندیانو پوښتنې او لیدو ته ورغی، د معلولینو وضعیت یې له نږدې وڅاره او هغوی ته یې ډاډ ورکړ چې د شهیدانو او معلولینو چارو وزارت له منظور شوې طرحې سره سم به، پر وخت هغوی ته نغدي مساعدتونه ورکړل شي.
همداراز، د شهیدانو او معلولینو چارو رئیس د زندانونو د چارو تنظیم ریاست له مسؤلینو مننه وکړه، چې د بندیانو ساتنه او پالنه په ښه توګه تر سره کوي او دا زمینه یې برابره کړې، ترڅو دوی وکولای شي د معلول بندیانو له وضعیت څخه له نږدې معلومات ترلاسه کړي.
په ورته وخت کې، معلول بندیانو د شهیدانو او معلولینو چارو ریاست د پلاوي د لیدنې له امله خوښي وښوده او ویې ویل چې مشران یې له دوی سره مهربانه دي او حتی په محبس کې هم د هغوی احوال اخلي او وضعیت ته یې پاملرنه کوي.
