د کابل ولایت په ده سبز ولسوالۍ کې د لسو (۱۰) مستحقو کورنیو لپاره د استوګنې کورونو د جوړولو چارې پیل شوې
د شهیدانو او معلولینو چارو وزارت د یتیمانو د ملاتړ په موخه، د اچ، اچ، آر، ډي نړیوالې مؤسسې سره په همغږۍ د کابل ولایت په ده سبز ولسوالۍ کې د لسو (۱۰) یتیمانو کورنیو لپاره د استوګنې کورونو د جوړولو چارې پیل کړې.
د یادې پروژې چارې د کابل ولایت د شهیدانو او معلولینو چارو رئیس محترم قاري شمس الامین زهیر، د وزارت د پروژو د تطبیق څخه د څارنې او ارزونې آمر محترم ملا مطیع الله ابوالمختار، د ده سبز ولسوالۍ د ولسوال مرستیال او د اچ، اچ، آر، ډي مؤسسې مسؤلینو په شتون کې پېل شوې.
د دې پروژې له مخې به هرې کورنۍ ته یو معیاري کور چې دوه استوګنیزې خونې، یو پخلنځی، یو دهلیز او یو تشناب ولري، جوړ او د ګټې اخیستنې لپاره به ورته وسپارل شي. یاد مستحق کسان څه موده وړاندې د شهیدانو او معلولینو چارو په وزارت کې د یوې شفافې او عادلانه قرعه کشۍ له لارې ټاکل شوي وو.
د یادونې وړ ده چې د یادو کورونو د جوړولو ټولیز لګښت (۷۱) زره او (۳۷۰) ډالره کېږي او چارې به یې د یوې میاشتې په موده کې بشپړې شي.
