د شهیدانو او معلولینو چارو وزارت د څارنې او ارزونې ځانګړي پلاوي په سرپل ولایت کې د یاد وزارت اړوند ریاست د کړنو او فعالیتونو هر اړخیزه ارزونه وکړه.
د شهیدانو او معلولینو چارو وزارت د مالي او اداري چارو عمومي رئیس مولوي کلیم الله افغان چې د یو با صلاحیته پلاوي په مشرۍ سرپل ولایت ته د شهیدانو او معلولینو ریاست د څارنې او ارزونې په موخه سفر کړی، په نوموړي ولایت کې د دغه ریاست د ارزونې پرمهال خبرې وکړې او زیاته یې کړه: یتیمان او معلولیت لرونکي وګړي د ټولنې تر ټولو اړمن قشر دی او باید د هغوې د حقوقو او امتیازاتو په ورکړه کې هیڅ ډول خنډ او ځنډ رامنځته نشي.
نوموړي همدا راز زیاته کړه: د افغانستان اسلامي امارت د یتیمانو او معلولینو د اقتصادي ستونزو په پام کې نیولو سره د نورو دولتي ادارو په پرتله د دغه مظلوم قشر لپاره ځانګړې پاملرنه کړې ده.
نوموړي وویل، اړوند مسوولین دې د یتیمانو د وکیلانو له خوا د یتیمانو حقوقو او امتیازاتو د ورکړۍ څرنګوالې وڅیړي تر څو یتیمان خپل حقوق په ښه توګه ترلاسه کړي. نوموړي د اړوند رياست له کارکوونکو وغوښتل، چې له مراجعينو سره ښه چلند وکړي.
د شهیدانو او معلولینو چارو وزارت د مالي او اداري چارو عمومي رئیس سره راغلي پلاوي د معلولینو او یتیمانو د تثبیت په پروسه کې د روڼتیا د معلومولو او همدارنګه د طرحې سره سم د هغوی د حقوقو د ورکړې په برخه کې له یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د شهیدانو وارثینو او معلولینو ته د خدمتونو د وړاندې کولو د څرنګوالي په اړه پوښتنې وکړې.
د سرپل ولايت د شهيدانو او معلولينو چارو رئيس ملا سيف الرحمن ابو طلحه د شهيدانو وارثينو او معلولينو ته د خدمتونو د وړاندې کولو په باب خبرې وکړې او د جعلکارۍ په تور يې د څو تنو نيول کيدو يادونه وکړه او زياته يې کړه چې نیول شوي کسان د څیړنې په موخه عدلي او قضايي ارګانونو ته سپارل شوي دي. نوموړي دغه راز ډاډ ورکړ، چې د یاد ریاست کارکوونکي پر وخت او په شفاف ډول سره د خدمتونو په وړاندې کولو کې خپلې ټولې هلې ځلې کوي.
د نوموړي پر وينا، دوې په یاد ریاست کې د یتیمانو او معلولیت لرونکو وګړو پر وړاندې د پرتو ستونزو او ننګونو د حل په موخه کمېسيون رامنځته کړې، تر څو په ولسوالېو کې د دې رياست چارې او فعاليتونه وڅېړي.
د شهیدانو او معلولینو چارو وزارت څخه راغلي پلاوي د یتیمانو او معلولیت لرونکو وګړو پر وړاندې د پرتو ستونزو او ننګونو د حل په موخه د سرپل ولایت له والي مولوي محمد یعقوب عبدالرحمن اکه سره هم وکتل، په یاده کتنه کې د نوموړي ولایت والي د یتیمانو او معلولینو د ستونزو او ننګونو د حل په موخه د هراړخیزې همکارۍ ژمنه وکړه.
