د نظامي شهيدانو ورثې او معلولینو ستونزو ته رسيدنه مو کاري لومړيتوب دی
د نظامي شهيدانو ورثې او معلولینو ستونزو ته رسيدنه مو کاري لومړيتوب دی
نن سه شنبه د کب په ۲۶مه، د شهيدانو او معلولينو چارو سرپرست وزير پوهنمل حميدالله فاروقي له نظامي معلولينو او شهيدانو ورثې استازو سره وکتل.
په پيل کې د نظامي شهيدانو ورثې او معلولينو استازو ښاغلي فاروقي ته د نوي مسووليت مبارکي وويله او په چارو کې يې ورته د زياتو برياوو هيله وکړه.
دوی له ښاغلي فاروقي سره د نظامي معلولينو او شهيدانو ورثې د معاشونو د ځنډ، د تېرو کلونو د پاتې حقونو، کارموندنې، فزيکي لاسرسي، سرپناه، زدکړو، د حج سهميې او د سولې په پروسه کې د ونډې او ګډون په برخو کې شته ستونزې شريکې کړې او د وزارت له رهبرۍ يې د حل غوښتنه وکړه.
د شهيدانو او معلولينو چارو سرپرست وزير پوهنمل حميدالله فاروقي د خپلو خبرو په پيل کې، د نظامي معلولينو او شهيدانو ورثې له استازو د هميشنۍ همکارۍ له امله مننه وکړه او د هغوی د قربانيو، لاسته راوړنو او سرښندنو ستاينه يې وکړه.
ښاغلي فاروقي وويل: چې جمهور رئيس او حکومت ستاسو د قربانيو احسانمند دي او پر همدې بنسټ تاسو ورته تر بل هرچا زيات لومړيتوب لرئ.
دده په خبره، چې د نظامي شهيدانو وارثينو او معلولینو ته به د ۱۴۰۰ کال حقوق د کال په لومړۍ ربعه کې په يو ځایي توګه ورکړل شي او د تېرو کلونو پاتې حقوق به يې د اسنادو د څېړنې او ارزونې کميسيون د پروسې تر بشپړيدو وروسته تاديه شي.
نوموړي زياته کړه، چې پورته يادې شوې ستونزې، اندیښنې او غوښتنې يې جمهوري رياست عالي مقام ته د وزارت لخوا په چمتو شوي راپور کې شاملې کړې دي، کوم چې د کابينې په غونډه کې به د ولسمشر په حضور کې له اړوندو دولتي او خصوصي ادارو سره په ګډه پرې بحث وشي او د محسوسو پايلو تر حاصليدو وروسته به له تاسو سره شريکې شي.
ښاغلي فاروقي ژمنه وکړه، چې په پوره ريښتينولۍ، ژمنتيا او اخلاص سره به د ټولنې دې جنګ ځپلي قشر د حقونو د ترلاسه کولو لپاره مبارزه کوي او د هغوی ستونزو، غوښتنو او وړانديزونو ته د رسيدنې په برخه کې به خپلو هلو ځلو ته دوام ورکوي.
