اطلاعاتو ته لاسرسی د ښې حکومتوالۍ اصل دی؛ د فساد مخنیوي او روڼتیا ټینګښت کې اساسي نقش لري
اطلاعاتو ته لاسرسی د ښې حکومتوالۍ اصل دی؛ د فساد مخنیوي او روڼتیا ټینګښت کې اساسي نقش لري
اطلاعاتو ته د لاسرسي کمېسیون کمېشنرې زهرا موسوي او ورسره مل پلاوي د شهیدانو او معلولینو په چارو کې د دولت وزیر لعل الدین آریوبي سره اطلاعاتو ته د لاسرسي لپاره د عامه پوهاوي په اړه ناسته وکړه.
ښاغلي آریوبي د یاد کمېسیون له کمېشنرې زهره موسوي او پلاوي مننه وکړه، چې د تېرې ناستې له ژمنې سره سم یې وزارت ته تشریف راوړ، تر څو اطلاعاتو ته د لاسرسي په اړه د وزارت مسولینو ته پوهاوی او معلومات ورکړي. ښاغلي آریوبي اطلاعاتو ته لاسرسی د خلکو حق وګاڼه او په ښې حکومتوالۍ، فساد مخنیوي او روڼتیا رامنځته کولو کې یې اطلاعاتو ته د لاسرسي پر ارزښت خبرې وکړې.
اطلاعاتو ته د لاسرسي کمېسیون کمېشنرې آغلې زهره موسوي وویل: اطلاعاتو ته د لاسرسي کمېسیون مخینه ډېره نه ده، خلک یې د فعالیتونو او صلاحیتونو په اړه معلومات نلري، دا یې مسولیت دی، چې د عامه پوهاوي دغه ډول برنامې جوړې او ټولو ادارو سره غونډې ترسره کړي. مېرمن موسوي زیاته کړه، چې اطلاعاتو ته لاسرسی په پرېکړه نیونه کې د ولس پر نقش، حساب ورکونه، فساد مخنیوي، روڼتیا تامین، د خلکو او حکومت تر منځ د باور په ټینګښت ډېر اغېز لري او د ولس ملکیت دی. نوموړې د وزارت له رهبرۍ مننه وکړه، چې اطلاعاتو ته د لاسرسي په برخه کې کمېسیون سره د اړیکو، همکارۍ او همغږۍ پراختیا او ټینګښت ته ژمن دي.
د یاد کمېسیون د عامه پوهاوي متخصصینو د وزارت مسولینو ته د کمېسیون د دندو او صلاحیتونو او د اطلاعاتو ورکړې د څرنګوالي په اړه پرزنټیشن وړاندې کړ او په دې اړه یې د ګډونوالو پوښتنو ته ځوابونه وویل.
