د شهيدانو او معلولينو په چارو کې د دولت وزير لعل الدين آريوبي د لوګر ولايت د اسنادو د څېړنې کميسيون له غړو سره وکتل
د شهيدانو او معلولينو په چارو کې د دولت وزير لعل الدين آريوبي د لوګر ولايت د اسنادو د څېړنې کميسيون له غړو سره وکتل
نن دوشنبه (۳۱وږې) د ولايتي سفر په ترڅ کې د شهيدانو او معلولينو په چارو کې د دولت وزير ښاغلي لعل الدين آريوبي، د لوګر والي محترم اجمل شاپور په ګډون، د ولايت د شهيدانو او معلولينو چارو د اسنادو د څېړنو کميسيون له غړو سره ليدنه وکړه.
په دې ليدنه کې د لوګر د لويې څارنوالۍ، د عامې روغتيا، د احصايې او معلوماتو ادارې، د ملي امنيت رئيسانو، د شهيدانو او معلولينو چارو آمر ، د محکمې او ولايت مقام باصلاحيته استازو ګډون درلود.
ښاغلي آريوبي د شهيدانو او معلولينو چارو د اسنادو د څيړنې کمېسيون غړو سره د ياد کمېسيون پر کار او د اسنادو د څيړنو پروسې د لا شفافيت په موخه د برېښنايي پېژندپاڼو د وېش پر چټکتيا خبرې وکړې.
د ښاغلي آريوبي په خبره، چې دوی ته د شهيدانو وارثینو او معلوليت لرونکو وګړو د ستونزو حل لومړيتوب لري او هغوی ته د ژوند له لومړنيو اړتياوو را نيولې تر روغتيايي او تحصيلي زمينو برابرولو پورې اسانتياوې بايد برابرې شي.
نوموړي د لوګر اړوندو ادارو ته سپارښتنه وکړه، چې د شهيدانو وارثينو، کورنيو غړو او معلوليت لرونکو وګړو ستونزو ته دې پر وخت رسېدنه وکړي.
د ناستې په ترڅ کې د شهيدانو او معلولينو چارو د اسنادو څېړنې کميسيون غړو له وزير صيب او مل پلاوي څخه مننه وکړه، چې د ياد ولايت د شهيدانو وارثينو او معلوليت لرونکو وګړو غوښتنې، ستونزې، وړاندېزونه له نږدې واورېدل او په همدې موخه يې لوګر ته سفر را وکړ. د کمیسیون غړو زیاته کړه چې، په لوګر ولایت کې ۲۸۰۰ د شهیدانو ورثې او معلولین ثبت دي، له دې څخه سل داسې اسنادونه رد شوي چې په ناقانونه توګه ادارې سره ثبت شوي وو او بررسي لا هم دوام لري.
ښاغلي آريوبي د شهيدانو او معلوليت لرونکو وګړو د اسنادو پروسې پر شفافيت د ټينګار تر څنګ، د وزارت له اړخه له ټولو مسولو ولايتي چارواکو سره د هر ډول همکاريو ژمنه وکړه.
