لغمان کې د معلولیت لرونکو وګړو نړیواله ورځ ونمانځل شوه.
لغمان کې د معلولیت لرونکو وګړو نړیواله ورځ ونمانځل شوه.
نن د پنجشنبې په ورځ د لېندۍ په ۱۳ نېټه په ولایت مقام کې د معلولیت لرونکو وګړو نړیواله ورځ چې د ډسمبر له ۳ نېټې سره برابره ده دیوې غونډې په ترسره کېدو سره ونمانځل شوه چې پکې د شهیدانو د کورنیو او معلولینو ستونزې هم واوریدل شوې.
په دې غونډه کې د لغمان مرستیال والي الحاج شهزاده مظلوم یار سربېره، دولایتي شورا رئیس، ختیځ کې د سویډن کمېټې د معلولینو د برخې استازي او لسګونه د شهیدانو د کورنیو غړو او معلولیت لرونکو وګړو ګډون کړی وو.
په پیل کې د لغمان ولایت د شهیدانو او معلولینو د چارو امر بشیراحمد حق پال د ښه راغلاست ترڅنګ د شهیدانو او معلولینو په چارو کې د دولت وزیر پیغام ولوسته.
په پیغام کې راغلي وو چې دولت ژمن دی ترڅو د ټولو شهیدانو د کورنیو او معلولینو هر اړخیزو ستونزو، د دوی اساسي خدماتو حل او نورو برخو ته کار وکړي.
نوموړي دغه راز وویل چې په لغمان ولایت کې څه دپاڅه ۱۲ زره دشهیدانو او معلولینو کورنۍ له حکومت څخه کلني حقوق اخلي.
نوموړي د لغمان د شهیدانو او معلولینو د چارو په امریت کې د شته خدماتو او شفافیت اړوند هم بشپړ ډاډ ورکړ.
نوموړي د لغمان د شهیدانو او معلولینو د چارو امریت د تشکیل د زیاتوالي غوښتتنې سربېره، معلول وګړو ته د هر اړخیزې پاملرنې غوښتنه وکړه.
دلغمان ولایت مرستیال والي الحاج شهزاده مظلوم یار په خپلو خبرو کې د شهیدانو د کورنیو او معلولینو قربانۍ وستایلې او بشپړ ډاډ یې ورکړ چې د معلولینو ټولو ستونزو ته به د ولایتي ادارې په صلاحیت کې ځانګړې پاملرنه لري.
