د معلولیت د ملي ستراتېژۍ په تطبیق، په دندو د معلولینو د ګمارنې او فزیکي لاسرسي برخو کې باید هر اړخیزه همکاري وشي
د معلولیت د ملي ستراتېژۍ په تطبیق، په دندو د معلولینو د ګمارنې او فزیکي لاسرسي برخو کې باید هر اړخیزه همکاري وشي
د شهیدانو او معلولینو په چارو کې د دولت وزارت د برنامو او همغږۍ مرستیالې صبري اندړ د سیمه ییزو ارګانونو خپلواکې ادارې رییس شمیم خان کټوازي سره وکتل او د شهیدانو د ورثې او معلولینو اړوندو چارو یې خبرې وکړې.
آغلې اندړ د یادې ادارې مسولیتونو ته په اشارې وویل، چې په ولایتونو کې دې د شهیدانو د ورثې او معلولینو د اسنادو او وثیقو د څېړنې او سمونې بهیر چټک شي، د دې تر څنګ دې په ولایتي ادارو کې د معلولیت لرونکو وګړو فزیکي لاسرسي او پر دندو د ګمارنې موضوع ته هم پاملرنه زیاته شي. نوموړې د معلولیت په لس کلنې ملي ستراتېژۍ کې د یادې ادارې نظرونه او په تطبیق کې یې نقش مهم وګڼه او د عمل په ملي پلان یې هم بحث وکړ.
د سیمه ییزو ارګانونو خپلواکې ادارې رییس شمیم خان کټوازي معلولیت یوه ملي پدیده یاده کړه وویل، چې په ولایتي مسولینو به د اسنادو او وثیقو د څېړنې او سمونې لپاره ټینګار وکړي، د معلولینو په ګمارنه او د فزیکي لاسرسي اسانتیاوو برابرولو برخه کې به هم هر اړخیزه همکاري وکړي.
ښاغلي کټوازي د معلولینو او د شهیدانو ورثې اړوندو چارو او ستونزو ته د رسېدنې په موخه د دواړو ادارو تر منځ د همغږۍ او همکارۍ په لا پراختیا او پیاوړتیا تاکید او د هر ډول همکارۍ ډاډ یې ورکړ.
