د امر بالمعروف نهي عن المنکر او سمع شکاياتو وزارت مرستیال د شهیدانو او معلولینو چارو وزارت اړوند کارکوونکو ته اصلاحي وينا وکړه
د امر بالمعروف نهي عن المنکر او سمع شکاياتو وزارت د پاليسۍ او مسلکي چارو مرستیال محترم شیخ محمد فقیر محمدي نن د ماسپښين لمانځه وروسته د شهيدانو او معلولينو چارو وزارت اړوند کارکوونکو ته د امر بالمعروف او نهي عن المنکر وزارت قانون او د یو لړ نورو مهمو موضوعاتو په تړاو د یوې هر اړخیزې وینا په ترڅ کې وویل: د مجاهدینو په بې شمېره قربانېو او سرښندنو او د عامو مسلمانانو د دعاګانو په برکت نن ورځ په هېواد کې اسلامي نظام رامنځته شوی او موږ به د یو بل سره په تعاون، همغږۍ او په ګډه د دې نظام څخه ساتنه وکړو، او د دې نظام پیاوړتیا او ساتنه زموږ او ستاسو ذمه وارې او مسؤليت دی.
محترم شیخ محمد فقیر محمدي همداراز زياته کړه: د امربالمعروف او نهي عن المنکر په نوي قانون کې د ټولنې د هر وګړي حقونو ته ځانګړې پاملرنه شوې او حقوق یې خوندي دي او د قرآن عظیم الشان، د رسول اکرم صلی الله علیه وسلم د احاديثو او د فقهې په رڼا کې جوړ شوی، چې د مشائخو او علمای کرامو د کره څېړنې او تحقیق وروسته د عالیقدر امیرالمؤمنین حفظه الله تعالی له لوري منظور شو، او هر ماده یې د شریعت مطابق ده.
هغه همداراز له کارکوونکو وغوښتل چې د پلي کولو په برخه کې هر اړخیزه همکاري وکړي.
په ورته وخت کې د شهيدانو او معلولينو چارو مرستیال محترم شیخ صاحب عبدالحکیم حقاني هم د وزارت له کارکوونکو څخه د خوښي په څرګندولو سره وويل: د دې وزارت کارکوونکو خپل صورتونه او سیرتونه د شریعت مطابق برابر کړي، خپلې ورځنۍ چارې هم په ښه توګه ترسره کوي، او ډاډ یې ورکړ چې د امر بالمعروف او نهي عن المنکر قانون د هر اړخیز تطبیق لپاره به پوره هڅې وشي.
همداراز د دې وزارت د دعوت او ارشاد رئيس محترم مفتي عبدالاحد مسعود هم په هېواد کې اسلامي نظام د خدای جل جلاله یو ستر نعمت وباله او زياته یې کړه: دا اسلامي نظام خدای جل جلاله خلکو ته د تکلیفونو او قربانيو په مقابل کې ورکړ، د دې نظام رهبري علماء کرام کوي او ورځ په ورځ به قوي او پياوړی کېږي خو زمونږ مسؤلیت دی چې د دې نظام خدمت وکړو.
