محترم الحاج ملا عبدالرزاق آخند د دایکندي ولایت د شهیدانو او معلولینو چارو ریاست لپاره نوی رئیس معرفي کړ
د افغانستان اسلامي امارت د ریاست الوزراء عالي مقام د حکم پر اساس او د شهیدانو او معلولینو چارو وزارت د وړاندیز له مخې، محترم مولوي محمد نبي محمدي د دایکندي ولایت د شهیدانو او معلولینو چارو ریاست د نوي رئیس په توګه د دې وزارت د مسلکي او تخنیکي چارو مرستیال محترم الحاج ملا عبدالرزاق آخند له لوري کارکوونکو ته رسماً معرفي او خپلې چارې پېل کړې.
د دایکندي ولایت د شهیدانو او معلولینو چارو ریاست کې په همدې موخه جوړه شوې غونډه کې، د شهیدانو او معلولینو چارو وزارت د مسلکي او تخنیکي چارو مرستیال محترم الحاج ملا عبدالرزاق آخند، د دایکندي ولایت د والي مرستیال، د وزارت د اطلاعاتو او عامه اړیکو رئیس مفتي فیصل خاموش حضور درلود.
همداراز محترم الحاج ملا عبدالرزاق آخند د دایکندي ولایت له والي محترم مولوي نجیب الله رفیع سره د ولایت په مقام کې رسمي لیدنه وکړه.
په دې لیدنه کې، محترم الحاج ملا عبدالرزاق آخند د شهیدانو او معلولینو چارو ریاست لپاره د نوي رئیس د معرفي ترڅنګ، د یاد ریاست د فعالیتونو د پیاوړتیا او د شته ستونزو د حل په برخو کې د لا زیاتو همکاریو غوښتنه وکړه.
د یادونې وړ ده چې محترم مولوي محمد نبي محمدي تر دې وړاندې د پکتیا ولایت د شهیدانو او معلولینو چارو ریاست د رئیس په توګه دنده ترسره کوله، چې خپلې ورسپارل شوې چارې او مسؤلیتونه یې په بشپړ بریالیتوب سره ترسره کړې دي.
