د شهیدانو او معلولینو چارو وزارت د کارکوونکو چارو رياست کې د لا زياتې همغږۍ او د کاري بهير د ښه والي په موخه اداري غونډه ترسره شوه
د شهیدانو او معلولینو چارو وزارت د کارکوونکو چارو رئیس محترم مولوي محمد موسی صدیقي تر مشرۍ لاندې اداري غونډه ترسره شوه، چې په هغه کې د ریاست اړوند آمرینو او ټولو کارکوونکو ګډون کړی وو.
د غونډې په پېل کې د اړوندو څانګو کارکوونکو د تېرو دوو اوونيو د فعاليتونو، کړنو او اجراآتو مفصل راپور وړاندې کړ. وروسته په دقيق ډول د کارکوونکو د دندو لایحو د څيړلو په هکله بحث وشو، ورپسې د تصفیوي کمیسیون له خوا د مجاهدينو د جهاد دورې د خدمت په نهایي او تایید شوو فورمو کې د قدم د محاسبې موضوع او همدارنګه د مرکزي او ولایتي ریاستونو اړوند کارکوونکو د فعاليتونو او اجراآتو د وروستۍ ارزونې د پايلو د څېړنې په هکله، چې څه موده وړاندې ترسره شوی وه، هم هر اړخيز بحث وشو.
په دې غونډه کې ګډونوالو د چارو د لاښه والي په موخه خپل وړاندیزونه او نظرونه شریک کړل، په پای کې محترم مولوي محمد موسی صدیقي هم د کارکوونکو ترمنځ د ښې همغږۍ د پیاوړتیا او د چارو د ښه مؤثریت په موخه لازمې لارښوونې وکړې.
