د شهیدانو او معلولینو چارو وزارت ملت ته د یوه کال د عمده فعالیتونو او لاسته راوړنو راپور وړاندې کړ
د شهیدانو او معلولینو چارو وزارت مرستیال محترم شیخ صاحب عبدالحکیم حقاني د حکومت د اطلاعاتو او رسنېو په مرکز کې ملت ته، د دې وزارت د یوه کال د عمده لاسته راوړنو او ترسره شوېو فعالیتونو راپور وړاندې کړ.
د یاد پروګرام پر مهال د مالي او اداري چارو عمومي رئیس محترم مولوي کلیم الله افغان، د دفتر رئیس محترم قاري شاه محمد دوست، د دعوت او ارشاد رئیس محترم مفتي عبدالاحد مسعود، د شهیدانو چارو رئیس محترم مولوي روح الله نصرت، د معلولینو چارو رئیس محترم قاري عبدالکریم حلیمي، د مالي او حسابي چارو رئيس محترم قاري محمد امین دروېش، د څارنې او ارزونې رئیس محترم مولوي نورالحق حقاني ، د اطلاعاتو او عامه اړیکو رئیس محترم مفتي فیصل خاموش او ځینو آمرینو حضور درلود.
په پېل کې محترم شیخ صاحب عبدالحکیم حقاني یتیمان، کونډې او معلولین د ټولنې تر ټولو ځوریدلی او اړمن قشر و باله او د اسلامي امارت د رهبرۍ او دولتي او غیر دولتي ادارو په همکارۍ او همغږۍ یاد قشر ته یې په بېلابېلو برخو کې د خدمتونو وړاندې کول او هغوی ته د لازمو اسانتیاوو رامنځته کول د دې وزارت له لومړیتونو څخه یاد کړل.
محترم شیخ صاحب په دې وزارت کې د ثبت او راجسټر شويو یتیمانو، کونډو او معلولینو د شمېر یادونه وکړه او زیاته یې کړه: د مرکز په شمول د هېواد په ټولو ولایتونو کې تر دې دمه (۱۱۸۹۰۸) کورنۍ او (۶۵۳۲۶۵) تنه یتیمان، کونډې او معلولین ثبت شوې دي چې په یادو ارقامو کې ( ۳۶۹۵۳۳) تنه یتیمان، چې (۱۶۳۴۷۹) تنه ښځینه او ( ۱۶۲۱۹۵) تنه نارینه یتیمان شامل دي.
د شهیدانو او معلولینو چارو وزارت مرستیال د یتیمانو، کونډو او معلولینو د ثبت او راجسټر په پروسه کې د رامنځته شوي شفافیت او د عامه بودیجې د ضایع کیدو څخه د مخنیوي په هکله وویل: دې وزارت د مرکز او ولایتونو په کچه د تصفیې کمېټې ګمارلي چې تیر مالي کال کې د (۲۷۱۵۵۲) تنو یتیمانو، کونډو او معلولینو تصفیه ترسره کړې، د تصفیې په ترڅ کې (۲۸۱۸۳) تنه د نقدي مساعدتونو منظور شوې طرحې مطابق غیر مستحق ګڼل شوي او سیسټم څخه ایستل شوي.
همداراز د دې پروګرام په ترڅ کې محترم شیخ صاحب د یتیمانو، کونډو او معلولینو د ثبت په بهیر کې د شفافیت او کره والي رامنځته کولو په موخه د نوي الکټرونیکي سیسټم یادونه وکړه او وې ویل: د هېواد په (۲۸) ولایتونو کې بریښنایي سیسټم فعال شوی او په ټوله کې د (۲۶۴۳۳۵) تنو کونډو، یتیمانو او معلولینو معلومات پکښې ثبت او راجسټر شوي، د بریښنایي سیسټم له لارې هغوی ته د هویت کارتونه هم ورکړل شوي دي.
هغه همداراز وویل: د دې وزارت مشرتابه پلاوی وخت پر وخت د هېواد ټولو ولایتونو ته د کونډو ، یتیمانو او معلولینو څخه د حال اخیستنې، هغوی ته د خدمتونو وړاندې کولو د څرنګوالي او د اصولو مطابق حق حقدار ته د رسولو له لړۍ څخه د څارنې په موخه سفرونه ترسره کړي دي.
محترم شېخ صاحب یتیمانو، کونډو او معلولینو ته د نغدي مساعدتونو د ورکړۍ ترڅنګ هغوی ته د خیریه بنسټونو او مؤسسو په همکارۍ په بېلابېلو برخو کې د مرستو د وېشلو په هکله وویل: په تېر یو کال کې دې وزارت (۸۹۴۴۲) تنو مستحقو کونډو، یتیمانو او معلولینو ته مرستې چمتو او وېشلي دي.
هغه زیاته کړه: د معلولینو د بیاځواکمنتیا په برخه کې هم (۳۸۸۵) تنو یتیمانو، کونډو او معلولینو ته فیزیوتراپي، اورتوپیدي، د غوږونو، ذهني او رواني درملنې او معلولینو ته د نویو مصنوعي اعضاوو جوړولو او د ترمیمولو په برخو کې باکیفیته خدمتونه وړاندې شوي دي.
ورپسې د مالي او اداري چارو عمومي رئیس محترم مولوي کلیم الله افغان ملت ته د حساب ورکولو پروګرام په ترڅ کې وویل: دې وزارت د یو میکانیزم له مخې شپږ لکه دولس زره او اته اتیا (۶۱۲۰۸۸) کونډو، یتیمانو او معلولینو ته د تېر کال اسد له میاشتې څخه د ۱۴۰۳ مالي کال اسد میاشتې پورې ۱۵میلیارده او ۴۰۷ میلیونه۸۲۷ زره او ۷۰۸ افغانۍ د اسلامي امارت د شهیدانو ورثه ؤ او معلولینو ته، د ملکي شهیدانو پاتې کونډو، یتیمانو او معلولینو ته او همدا راز د تېرې ادارې د وژل شویو عسکرو او منسوبینو کونډو، یتیمانو او معلولینو ته د میاشتنۍ نغدي مساعدتونو په توګه د یوې منظمې طرحې له مخې په شفاف ډول د بانکي سیسټم له لارې حواله کړي دي.
هغه همداراز زیاته کړه: د مالیې محترم وزارت، د شهیدانو او معلولینو چارو وزارت د اړتیاوو پر بنسټ په روان مالي کال کې دولس (۱۲) میلیارده افغانۍ دې وزارت ته، بودیجه ځانګړې کړه چې یاد وزارت تر اوسه توانیدلی د منظور شوې بودیجې څخه څه کم اووه میلیارده افغانۍ په شفاف ډول مصرف کړي.
محترم مولوي صاحب کلیم الله افغان وویل: د شهیدانو او معلولینو چارو وزارت هڅه کوي تر څو یتیمانو او معلولینو ته د استوګنې لپاره ښارګوټي جوړ کړي او هغوی ته د هوسا او آرامه ژوند زمینه برابره کړي.
همداراز په دې پروګرام کې د دفتر رئیس محترم قاري شاه محمد دوست هم د یاد وزارت د راتلونکو پلانونو په هکله خبرې وکړې او د ناثبت شویو کونډو ، یتیمانو او معلولینو د تثبیت او ثبت لړۍ ته دوام ورکول، په شرایطو برابرو کونډو ، یتیمانو او معلولینو ته د منظور شوې طرحې مطابق د میاشتنیو نقدي مساعدتونو حواله کول، د غیر نقدي مرستو را جلبول، د معلولینو د بیا ځواکمنتیا په برخو کې د خدمتونو وړاندې کول، یتیمانو او معلولینو ته د فني او حرفوي زده کړو د زمینې برابرول یې د دې وزارت د راتلونکي کال له مهمو پلانونه څخه یاد کړل.
