MMD Presented His Last One Year Report To The Nation
د عقرب ۲۸- کابل د حکومت د رسنیو مرکز
د شهیدانو او معلولینو په چارو کې د دولت وزارت ملت ته د خپل تېر یو کال د فعالیتونو او لاسته راوړنو راپور وړاندې کړ!
د شهیدانو او معلولینو په چارو کې د دولت وزیر ښاغلي لعل الدین آریوبي د حکومت د رسنیو په مرکز کې ملت ته د خپل تېر کال کړنو او لاسته راوړنو په اړه راپور وړاندې کړ.
ښاغلي آریوبي په خپلو خبرو کې ملت ته د خپلو فعالیتونو راپور ورکول د ښې حکومتوالۍ بنسټیز اصل وباله وویل، چې له دې وړاندې یې هم ملت ته د خپلو کړنو راپور ورکړی او په راتلونکي کې هم د دې اصل د تحقق لپاره ژمن دی.
ښاغلي آریوبي د وزارت د رامنځته کېدو او د هغه مهال د موجودو ستونزو یادونه وکړه وویل، چې دا اداره له ټولو ستونزو او ننګونو سره، سره پر دې وتوانېده، چې په کم وخت د سیستم جوړونې سربېره فساد سره د مبارزې، اصلاحاتو او خدمتونو د ساده او اسانه کولو په برخه کې بنسټیز اقدامات ترسره کړي. د دې تر څنګ دې وزارت معلولیت لرونکو وګړو او د شهیدانو کورنیو ته یوازې د کلنیو حقوقو پر ورکړه بسنه نه ده کړې او د یاد قشر د ژوند د ښه والي لپاره یې په مختلفو برخو کې اړین کارونه لکه ترسره کړي دي، چې د معلولیت لرونکو وګړو د قانون د حقوقو او امتیازاتو تعدیلول، د نظامي شهیدانو او معلولینو لپاره د نظامي معاونیت رامنځته کول، د فساد پر ضد مبارزه، اصلاحاتو رامنځته کول، سیستم جوړونه، د معلولیت لرونکو وګړو د لاسنیوي او مرستې په موخه د ستراتېژۍ جوړول، د معلولیت اړوند د عامه پوهاوي ستراتیژي رامنځته کول، معلولیت لرونکو وګړو ته د کارموندنې، روغتیا، اقتصادي پیاوړتیا، زده کړو او ځان بسیاینې لپاره د طرحو او پلانونو جوړول، مراجعینو ته د واحدې دریڅې یا (One Stop Shop) جوړول، په ټولنیزو چارو کې د کړنلارو جوړول، معلولیت لرونکو وګړو ته د وړیا سکالرشیپونو او تخفیف په موخه د لوړو زده کړو موسسو او خصوصي پوهنتونو سره د هوکړه لیکونو لاسلیکول، د معلولیت لرونکو وګړو د مالي ملاتړ صندوق رامنځته کول، معلولیت لرونکو وګړو لپاره د ملي فدراسیون رامنځته کول، ملي او نړیوالو موسسو سره د معلولیت لرونکو وګړو په برخه کې د هوکړه لیکونو لاسلیکول او د امنیتي او دفاعي ځواکونو کورنیو ته د میاشتني کوپون ورکول پکې شامل دي.
د شهیدانو او معلولینو په چارو کې د دولت وزارت به راتلونکي کال کې د یاد قشر د ژوند د مثبت بدلون لپاره نورې اساسي برنامې هم لري، چې په پلي کېدو سره به اغېز په لویه کچه محسوس شي.
