د شهيدانو او معلولینو چارو وزارت سرپرست وزير محترم الحاج ملا عبدالمجید آخند په تخار ولایت کې د یاد وزارت اړوند رياست له کاري بهیر څخه ارزونه ترسره کړه
د شهيدانو او معلولینو چارو وزارت سرپرست وزير محترم الحاج ملا عبدالمجید آخند د هېواد شمالي ولایتونو ته د سفر په ترڅ کې د تخار ولایت د شهیدانو او معلولینو چارو ریاست د کاري بهیر څخه هراړخیزه ارزونه وکړه او د رسمي کارونو د ښه ترسره کولو په موخه یې د یاد ریاست مسؤلینو او کارکوونکو ته لازم هدایات ورکړل.
محترم الحاج ملا عبدالمجید آخند په دې سفر کې له یو شمېر معلولینو سره له نږدې وکتل، د هغوی ستونزې یې واورېدې او له هغوی سره یې یوه اندازه نغدي مرسته هم ترسره کړه.
محترم الحاج ملا عبدالمجید آخند تخار ولايت کې د یاد وزارت اړوند ریاست د مسؤلینو او کارکوونکو سره په کتنه کې وویل: " د اسلامي امارت د تېرې دورې راپدیخوا، زه هېوادوالو ته په خدمت کولو کې بوخت یم، په اوسنۍ راسپارل شوې دنده کې تر هروخت څخه ډیر د سکون او خوښۍ احساس کوم، هغه په دې خاطر چې دې اړمن قشر ته خدمت کوم ".
همداراز سرپرست وزير د یاد ریاست له مسؤلینو او کارکوونکو څخه وغوښتل تر څو په ورسپارل شویو دندو کې له پوره اخلاص څخه کار واخلي.
په دې سفر کې د شهيدانو او معلولینو چارو وزارت د دفتر رئيس محترم قاري شاه محمد دوست د سرپرست وزیر د سفر اصلي موخه تخار ولایت ته د یاد وزارت اړوند رياست د کاري بهیر لیدنه او همداراز یتیمانو، کونډو او معلولینو ته د میاشتنۍ نغدي مساعدتونو د ورکړې د څرنګوالي ارزونه یاده کړه.
نوموړي همداراز زیاته کړه: د شهیدانو او معلولینو چارو وزارت په دې هڅه کې دی تر څو د شهیدانو ورثه ؤ او معلولینو ته پر وخت خدمتونه وړاندې کړي اوهغوی ته په بیلابیلو برخو کې د ځان بساېنې په موخه د کاري فرصتونو زمینه برابره کړي.
د یادونې وړ ده چې تر دې وړاندې د شهيدانو او معلولینو چارو وزارت سرپرست وزير محترم الحاج ملا عبدالمجید آخند د سمنګان، بغلان او کندز ولایتونو کې د یاد وزارت اړوند ریاستونو د اجراآتو او فعالیتونو څخه ارزونه ترسره کړې وه.
