د شهیدانو او معلولینو چارو وزارت د مالي او اداري چارو عمومي رئیس په مشرۍ پلاوي په تخار ولایت کې د یاد وزارت د اړوند ریاست کړنې او فعالیتونه وڅېړل.
د شهیدانو او معلولینو چارو وزارت د مالي او اداري چارو عمومي رئیس مولوي کلیم الله افغان په مشرۍ با صلاحیته پلاوي چې د داخلي تفتیش رئیس مولوي احسان الله حقاني، د معلولینو چارو رئیس مولوي عبدالنافع منتفع او همدارنګه د ارزونې او څارنې ریاست غړی یې ملتیا کوي، په تخار ولایت کې د دغه وزارت اړوند ریاست کړنې او فعالیتونه یې په هر اړخیزه توګه بررسي او وڅیړل.
د مالي او اداري چارو عمومي رئیس د تخار ولایت د شهیدانو او معلولینو چارو ریاست د کاري بهیر د بررسي او څیړلو پر مهال د نوموړي ریاست کارکوونکو ته خبرې وکړې او ویې ویل: د ریاست ټول کارکوونکي باید د وزارت له لارښوونو او کړنلارو سره سم خپلې دندې پر مخ یوسي. هغه همداراز له کارکوونکو څخه وغوښتل تر څو یتیمانو او معلولیت لرونکو وګړو ته د غوره خدمتونو وړاندې کول له خپلو کاري لومړیتوبونو څخه وګڼي.
نوموړي د یاد ریاست کارکوونکي وهڅول چې په رسمي چارو کې له مراجعينو سره ښه چلند وکړي.
د یاد ریاست د څېړنې په ترڅ کې د شهیدانو او معلولینو چارو وزارت د داخلي تفتیش رئیس مولوي احسان الله حقاني چې د یتیمانو او معلولینو د تثبیت د پروسې په هکله یې خبرې کولې، ټینګار وکړ چې د معلولینو او یتیمانو د تثبیت پروسه باید د شهیدانو او معلولینو چارو وزارت لخوا د تصویب شوي طرزالعمل مطابق وي تر څو د ثبت په بهیر کې د جعل او تذویر مخنیوی وشي.
د تخار ولایت د شهیدانو او معلولینو چارو رئیس مولوي احسان الله عمري هم خبرې وکړې او د یاد پلاوي لخوا وړاندې شوې لارښوونې یې مراجعینو ته د خدمتونو د وړاندې کولو په برخه کې ګټورې وبللې.
د بررسۍ او څیړنې ځانګړي پلاوي د معلولینو او یتیمانو د تثبیت په پروسه کې د روڼتیا د معلومولو او همدارنګه د طرحې سره سم د هغوی د حقوقو د ورکړې په برخه کې له یو شمېر یتیمانو او معلولیت لرونکو وګړو سره له نږدې وکتل او له هغوی څخه یې د یاد ریاست له خوا د خدمتونو د وړاندې کولو د څرنګوالي په هکله پوښتنې وکړې.
د دې سفر په ترڅ کې د شهیدانو او معلولینو چارو وزارت د بررسۍ او څیړنې ځانګړي پلاوي د تخار ولایت د والي له مرستیال حاجي محمد کاظم طارق سره هم وکتل. په دې کتنه کې دواړو خواو یتیمانو او معلولینو ته د خدمتونو د وړاندې کولو پر څرنګوالي خبرې وکړې، د تخار د والي مرستیال یاد پلاوي ته ډاډ ورکړ چې د نوموړي ریاست پر وړاندې د شته ننګونو او ستونزو ته د حل په موخه به له دوې سره پوره همکاري وکړي. نوموړي زیاته کړه، موږ هڅه کوو چې د شهیدانو او معلولینو چارو ریاست خپله بودیجه پر وخت او په شفاف ډول مصرف کړي او موږ په دې برخه کې هر اړخیزه همکارۍ ته چمتو یو.
د يادونې وړ ده، چې ياد پلاوي تر دې وړاندې په باميان، بغلان، سمنګان، بلخ، جوزجان، سرپل او کندز ولايتونو کې د دغه وزارت اړوندو رياستونو کاري بهير څېړلى وو، او پام کې ده چې د بدخشان ولایت د شهیدانو او معلولینو چارو ریاست د کړنو او فعالیتونو څخه هم بررسي او څیړنه وکړي.
