د شهیدانو او معلولینو چارو وزارت پلاوي په ارزګان ولایت کې د یاد وزارت د اړوند ریاست له کړنو هر اړخیزه ارزونه وکړه
د شهیدانو او معلولینو چارو وزارت د مالي او اداري چارو عمومي رئیس ښاغلی مولوي کلیم الله افغان د یو با صلاحیته پلاوي سره د یاد وزارت د اړوند ریاست د کړنو او فعالیتونو د څارنې او ارزونې په موخه ارزګان ولایت ته سفر وکړ، او د یاد ولایت د شهیدانو او معلولینو چارو ریاست کارونه او فعالیتونه یې په هر اړخیز ډول وڅیړل. یاد پلاوي همداراز د بودیجې د مصرفولو پر وړاندې پرتې ستونزې له منځه یوړلې او د طرحې سره سم یې د بودیجې پر مصرفولو او شفافیت ټینګار وکړل.
ښاغلي مولوي کلیم الله افغان د ارزګان ولایت د شهیدانو او معلولینو چارو ریاست اړوندو مسئولینو ته په وینا کې وویل: په لومړي ځل په تیرو څو لسیزو کې د تیرو حکومتونو په پرتله د افغانستان اسلامي امارت وکولاې شوه تر څو د داخلي عوایدو څخه بودیجه تمویل کړي، او د هغوې څخه یې غوښتنه وکړه تر څو د بودیجې مصرفولو ته باید جدي پاملرنه وکړي، او دې ریاست ته ځانګړې شوې بودیجه په شفاف ډول مصرف او ګټې اخیستنې ته وسپاري.
د ارزګان ولايت د شهيدانو او معلولينو چارو رئيس ښاغلي مولوي عتيق الله منظور په دغه رياست کې پرتې ستونزې او ننګونې د یاد پلاوي سره شریکې کړې او د وزارت څخه راغلي پلاوي هم د ستونزو او ننګونو د حل پوره ډاډ ورکړ.
همدارنګه د وزارت څخه راغلي پلاوي د ارزګان ولایت له والي ښاغلي ملا محمد خان حاجي دعوت سره هم وکتل او د شهیدانو او معلولینو چارو ریاست پر وړاندې پرتې ستونزې او ننګونې د حل په موخه، له هغه سره شریکې کړې. د ارزګان والي د شهيدانو او معلولينو چارو رياست پر وړاندې د شته ستونزو او ننګونو له اوريدو وروسته د وزارت له راغلي پلاوي سره ژمنه وکړه چې د اړوند رياست ستونزې او ننګونې به ژر تر ژره حل کړي.
د دې سفر په ترڅ کې ښاغلي مولوي کلیم الله افغان د ارزګان ولایت د څلورمې پلې لوا له قوماندان ښاغلي مولوي عبدالله حبیب سره د لیدنې په ترڅ کې وویل: د شهیدانو وارثین او نظامي معلولیت لرونکي وګړي د افغاني ټولنې له قربانیانو څخه دي، او زیاته یې کړه: چې د شهیدانو او معلولینو چارو وزارت دې اغیزمن قشر(معلولیت لرونکو او یتیمانو) ته ځانګړې پاملرنه کوي، او هغوې ته د غوره خدمتونو وړاندې کول د وزارت له لومړیتوبونو څخه دي.
په پام کې ده چې د شهیدانو او معلولینو چارو وزارت پلاوی به د فراه، هلمند او کندهار ولایتونو د شهیدانو او معلولینو چارو ریاستونو د کړنو او فعالیتونو څخه هم ارزونه وکړي، چې د یاد پلاوي د سفر اصلي موخه د بودیجې د مصرفولو پر وړاندې د پرتو خنډونو او ستونزو له منځه وړل بلل شوي دي.
