د شهیدانو او معلولینو چارو وزارت د پلان او همغږۍ معین په کابل کې د ترکیې سفارت له دیني سلاکار سره وکتل.
د شهیدانو او معلولینو چارو د پلان او همغږي معین ښاغلي شیخ عبدالحکیم نن چارشنبه د ۱۴۰۰ کال د لیندۍ د میاشتې په ۱۷ نیټه په کابل کې د ترکیې د سفارت د دیني سلاکار مفتي عبدالجلیل سره د وزارت په مقر کې په یوه تعارفي غونډه کې برخه واخیسته.
په دې کتنه کې د هېواد په روانو حالاتو د نظرونو د تبادلې ترڅنګ، د دوست هېواد ترکیې او افغانستان ترمنځ د کلونو کلونو نږدې اړیکو په اړه هم خبرې وشوې.
شیخ عبدالحکیم زیاته کړه، اسلامي امارت د الهي نصرت په مرسته امریکا او د هغو متحدینو ته ماتې ورکړه او اوس زموږ هیواد د اسلامي امارت تر بیرغ لاندې په بشپړه خپلواکۍ کې دی او خلک د افغانستان له خپلواکۍ خوښ دي.
هغه زیاته کړه، افغانستان په بحراني اقتصادي وضعیت کې دی او د افغانستان د شهیدانو او معلولینو کورنۍ جدي مرستو او همکارۍ ته اړتیا لري.
نوموړي وویل چې د اسلامي امارت د شهیدانو او معلولینو د اسنادو د بشپړولو کار تکمیل شوی او اوس مهال د دوی تمرکز په جمهوري حکومت کې د فساد د مخنیوي په موخه د شهیدانو او معلولینو د اسنادو په دقیقه څیړنه ده او هڅې روانې دي تر څو د شهیدانو کورنېو او معلولینو ته لا ډیرې مرستې راجلب کړي.
شیخ عبدالحکیم همدا راز زياته کړه، اسلامي هېوادونه بايد په سختو حالاتو کې له يو بل سره مرسته وکړي، څو د بشري ناورين مخه ونيول شي، چې د ترکيې هیواد په دې برخه کې مخکښ دی او د نړۍ تر نورو اسلامي هېوادونو له افغانستان سره ډیرې بشري مرستې کړي او موږ ورڅخه مننه کوو.
شیخ عبدالحکیم وویل، چې په دې سختو شرایطو کې د شهیدانو او معلولینو چارو وزارت له اړمنو کورنېو سره د مرستې په موخه خوراکي توکو، جامو، درملو او برېښنایي ویلچیرونو ته سخته اړتیا لري.
مفتي عبدالجلیل تاریخي او فرهنګي اړیکو او ټولنیزو مشترکاتو ته په اشارې سره د هېواد اوسنی وضعیت د خپګان وړ وباله او زیاته یې کړه چې ترکیه او په کابل کې یې سفارت هڅه کوي چې له اسلامي امارت سره په همغږۍ د شهیدانو کورنېو او معلولینو ته مرستې چمتو کړي.
په پای کې دواړو لورو پر لا زیاتې همغږۍ او شته ظرفیتونو ټینګار وکړ او د اسلامي هېوادونو د سولې او پرمختګ لپاره یې دعا وکړه.
