په کندهار ولایت کې پر (۱۰) تنو مستحقو کسانو باندې زرنج نقلیه وسایط ووېشل شول
د کندهار ولایت د شهیدانو او معلولینو چارو ریاست د شهیدانو کورنیو او معلولینو د اقتصادي ځان بسیاینې په موخه د یوې خیریه مؤسسې سره په همغږۍ پر (۱۰) تنو مستحقو یتیمانو او معلولیت لرونکو وګړو باندې زرنج نقلیه وسایط ووېشل.
مستحقو کسانو ته د زرنج نقلیه وسایطو د وېش پر مهال د کندهار ولایت د شهیدانو او معلولینو چارو رئیس محترم الحاج ملا عبدالقاهر فېروز د خیریه مؤسسې له مرستو یې خوښي څرګنده کړه چې د یادو بې سرپرسته کورنیو لاسنیوی او ملاتړ یې کړی دی.
نوموړي همداراز د شهیدانو کورنیو او معلولینو ته ډاډ ورکړ چې یاد ریاست هڅه کوي ترڅو د هغوی لپاره د ژوند لازمې اسانتیاوې برابرې کړي او د هغوی اقتصادي ستونزو ته په ښه ډول رسیدګي وکړي.
