د شهیدانو او معلولینو چارو وزارت سرپرست وزير محترم الحاج ملا عبدالمجید آخند په خپل کاري دفتر کې د ترکیې هېواد د ( (SKM) کمپنۍ له مشر محترم ډاکټر عباس فرساد سره وکتل
په دې لیدنه کې د شهیدانو او معلولینو چارو وزارت مسلکي او تخنیکي مرستیال محترم الحاج ملاعبدالرزاق اخند، د مالي او اداري چارو عمومي رئیس محترم مولوي کلیم الله افغان، د یاد وزارت د دفتر رئيس محترم قاري شاه محمد دوست او د الهام هوفياني ساختماني او سوداګریز شرکت اجرايوي مدير محترم الحاج محمد زمان حضور درلود.
په دې کتنه کې د شهیدانو او معلولینو چارو سرپرست وزیر محترم الحاج ملا عبدالمجید اخند د یتیمانو، کونډو او معلولینو پر وړاندې د شته ستونزو او ننګونو په هکله او همدارنګه د دغه وزارت له لوري هغوی ته د خدمتونو د وړاندې کولو پر څرنګوالي هر اړخیزې خبرې وکړې.
همدارنګه په دې ليدنه کې د ترکیې هېواد د (SKM) کمپنۍ رئيس محترم ډاکټر عباس فرساد د یادې کمپنۍ د پروژو او پروګرامونو په هکله معلومات وړاندې کړل او زياته يې کړه: د شهیدانو او معلولینو وزارت د ټولنې د هغو اغیزمنو وګړو په خدمت بوخت دی چې د لوی خدای جل جلاله په لاره کې یې خپل خوږ ژوند قرباني کړی دی.
نوموړي زياته کړه: یاده کمپنۍ به د یتیمانو، کونډو او معلولینو لپاره ښارګوټي جوړوي او د یتیمانو او معلولینو د اقتصادي بساینې په موخه د حرفوي زده کړو په برخه کې د امکاناتو چمتو کولو ته خپله ژمنتیا ښيي.
په دې لیدنه کې د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان په غزني، فراه او هلمند ولایتونو کې د معلولینو او یتیمانو لپاره د ښارګوټيو د جوړولو د پروپوزل د چمتو کولو پر څرنګوالي هر اړخیزې خبرې وکړې.
همدارنګه د شهیدانو او معلولینو چارو وزارت د دفتر رئیس محترم قاري شاه محمد دوست هم د یتیمانو او معلولینو په برخه کې د شته ستونزو او ننګونو یادونه وکړه. نوموړي همدا راز په مرکز او ولایتونو کې د ثبت او راجسټر شويو یتیمانو، کونډو او معلولینو شمېر د یادې کمپنۍ له رئیس شریک کړل.
د یادولو وړ ده چې د ترکیې هېواد (SKM) کمپنۍ د الهام هوفیاني سوداګریز او ساختماني شرکت په بلنه افغانستان ته د پانګونې او بشري مرستو په موخه راغوښتل شوې چې په بېلابېلو برخو کې د دغه هېواد له زیانمنو خلکو سره به مرستې وکړي.
