د شهیدانو او معلولینو چارو په وزارت کې د اداري فساد سره د مبارزې په موخه غونډه ترسره شوه
د شهیدانو او معلولینو چارو په وزارت کې د فساد د مخنيوي په موخه غونډه ترسره شوه په یاده غونډه کې چې د وزارت ټولو کارکوونکو ګډون درلود، په پیل کې د شهیدانو او معلولینو چارو وزارت د اطلاعاتو او عامه اړیکو مسئول مفتي فیصل خاموش دفساد سره د مبارزې په هکله خبرې وکړې او زیاته یې کړه چې د شهیدانو له کورنېو څخه د بډې اخیستل تر ټولو ناوړه فساد بلل کیږي.
د دعوت او ارشاد رئیس مفتي عبدالاحد مسعود غونډې ته وینا وکړه او د اداري فساد په ناوړه پایلو يې خبرې وکړې او له کارکوونکو څخه ېې وغوښتل تر څو په ورځنې چارو کې د خپل څښتن تعالی څخه ویره ولري او د اداري فساد سره د مبارزې په برخه کې خپل ایماني او وجداني مسئولیت ادا کړي.
په دې غونډه کې همداراز د بشري سرچینو رئیس مولوي محمد موسی صدیقي هم ګډونوالو ته وینا وکړه او زیاته یې کړه چې موږ په خپلو ورځنیو چارو کې د اسلام کلتور عملي کړو او هر کارکوونکی د خپلو کړنو په مقابل کې مسئولیت لري او په کار ده چې د یتیمانو او معلولیت لرونکو وګړو د حقوقو د ضایع کیدو څخه په هر اړخیزه توګه مخنیوي وشي.
د یادې غونډې په ترڅ کې مولوي عبدالقیوم حقاني د یادې موضوع په هکله خبرې وکړې او د شهیدانو او معلولینو چارو وزارت له کارکوونکو څخه وغوښتل تر څو خپلو کړنو ته پاملرنه وکړي.
د غونډې په پای کې د شهیدانو او معلولینو چارو وزارت د دفتر رئیس قاري شاه محمد دوست کارکوونکو ته په ورځنېو کړنو کې د اخلاص په درلودلو، کونډو او یتیمانو ته د ښو او غوره خدمتونو په وړاندې کولو کې لازمې سپارښتنې وکړې.
