ژمن یو چې د شهیدانو ورثې او معلولیت لرونکو وګړو ته د زده کړو زمینه برابره کړو
ژمن یو چې د شهیدانو ورثې او معلولیت لرونکو وګړو ته د زده کړو زمینه برابره کړو
د شهیدانو او معلولینو چارو سرپرست وزیر پوهنمل حمید الله فاروقي په کابل کې د دوست هېواد مصر له سفیر احمد محمود اسماعیل عثمان سره په خپل کاري دفتر کې وکتل.
په پیل کې ښاغلي فاروقي د دوست هېواد سفیر ښاغلي عثمان ته ښه راغلاست ووایه او د دواړو هېوادونو په اوږدمهاله دوستانه، سیاسي او دپیلوماتیکو اړیکو یې خبرې وکړې وویل، چې د دواړو هېوادونو د دوستانه اړیکو څه کم سل کاله پوره کېږي، چې بنسټ یې د دواړو هېوادونو د پخوانیو پاچاهانو شاه غازي امان الله خان او ملک فواد له لوري ایښودل شوی دی.
ښاغلي فاروقي زیاته کړه، چې تاریخي پېښو د دواړو هېوادونو په دوستانه او دیپلوماتیکو اړیکو وخت ناوخت اغېز کړی، خو هیڅ کله هېرې شوې نه دي او دواړو یو بل سره همکاري دومداره ساتلې ده.
ښاغلي فاروقي د دوست هېواد مصر له سفیر مننه وکړه، چې د افغانستان ډېرو ځوانانو ته یې د دې هېواد په الازهر او نورو لویو پوهنتونو کې د زده کړو زمینه برابره کړې ده، د دې تر څنګ یې په هېواد کې دننه هم د ځوانانو د روزنې لپاره ښوونیز مرکزونه جوړ کړي دي او په ټولو مسایلو کې یې افغان حکومت سره ښه همغږي او همکاري لرلې ده. ښاغلي فاروقي هیله څرګنده کړه، چې د نورو افغانانو تر څنګ د شهیدانو ورثې او معلولینو ته هم په مصر کې د زده کړو زمینه برابره شي.
د دوست هېواد مصر سفیر وویل، چې هېواد یې هر کال افغان ځوانانو ته لسګونه تحصیلي بورسونه ورکوي او د وړتیا لوړونې برنامې ترسره کوي. نوموړي څرګنده کړه، چې د شهیدانو ورثه او معلولین د ټولنې مستحق خلک دي او ژمن دی، چې په راتلوونکي کې یې هېواد دوی ته هم د لوړو زده کړو په موخه تحصیلي بورسونه چمتو کړي.
ښاغلي عثمان زیاته کړه، چې د وزارت او سفارت تر منځ به دغه ډول ناستې دوامداره وي، تر څو دواړه خواوې د مرستو د تنظیم لپاره مشخصه کړنلاره رامنځته کړي.
