د شهيدانو او معلولينو په چارو کې د دولت وزیر، د معلولينو استازو سره د ليدنې پر مهال له اړونده ادارو سره د شويو هوکړه ليکونو پر تطبيق ټينګار وکړ
د شهيدانو او معلولينو په چارو کې د دولت وزیر، د معلولينو استازو سره د ليدنې پر مهال له اړونده ادارو سره د شويو هوکړه ليکونو پر تطبيق ټينګار وکړ
نن يکشنبه د مرغومې په ۱۴مه، د شهيدانو او معلولينو په چارو کې د دولت وزير لعل الدين آريوبي د معترضو معلولينو استازو سره وکتل او د معلولينو د عرفو، استوګنځيو، کارموندنې، زدکړو، د برېښنايي پېژندپاڼو د وېش او د معاشونو د ورکړې په تړاو يې خبرې اترې وکړې.
ښاغلي آريوبي په دې ليدنه کې له اړونده ادارو سره د شويو هوکړه ليکونو د تطبيق بهير د سستوالي يادونه وکړه او زياته يې کړه، چې ټولې مسولې ادارې يې پر پلې کولو کې يو شان مسووليت لري.
نوموړي څرګنده کړه، چې د کابل ښاروالي د معلولينو د عرفو د تخريب لپاره بايد مناسب بديل ولري او له وزارت سره به د شوې هوکړې له مخې د عمل يو کلن پلان هم شريکوي.
ښاغلي آريوبي د استوګنځيو د وېش په بهير کې د موجوده ستونزو یادونه وکړه او زياته يې کړه، چې ددې ستونزې د هواري لپاره د مسولو ادارو هڅې روانې دي.
د شهيدانو او معلولينو په چارو کې د دولت وزير په دې سربېره د شهيدانو وارثينو او معلوليت لرونکو وګړو د معاشاتو د ځنډ په تړاو هم خبرې وکړې او لارښوونه يې وکړه، چې د شهيدانو ټول وارثين او معلولين بايد برېښنايي پېژندپاڼې واخلي، ځکه چې راتلونکي ۱۴۰۰ ه ل، کال کې د ټولو حقوق د برېښنايي پېژندپاڼو له مخې حواله کېږي.
