د مشرانو جرګې له لوري د شهیدانو او معلولینو په چارو کې د دولت وزارت او د نظامي چارو د انسجام معاونیت د رامنځته کېدو د تصویب په اړه اعلامیه
د مشرانو جرګې له لوري د شهیدانو او معلولینو په چارو کې د دولت وزارت او د نظامي چارو د انسجام معاونیت د رامنځته کېدو د تصویب په اړه اعلامیه
۱۳۹۹ د چنګاښ ۲۹
د هېواد مشرانو جرګې نن یکشنبه (د چنګاښ ۲۹) د دې جرګې په عمومي غونډه کې د جمهور رییس د (۱۳۹۷/۱۰/۲۹) نېټې د (۱۳۲) ګڼې فرمان پر بنسټ رامنځته شوې (د معلولیت لرونکو وګړو او د شهیدانو ورثې د ملاتړ ملي اداره) د شهیدانو او معلولینو په چارو کې د دولت وزارت په نامه بدله او د دې تر څنګ یې د دې وزارت د نظامي معلولینو او شهیدانو چارو د انسجام معاونیت رامنځته کېدل تصویب کړه.
د شهیدانو او معلولینو په چارو کې د دولت وزارت رهبري د هېواد د معلولیت لرونکو وګړو او د شهیدانو ورثې په استازولۍ د مشرانو جرګې له مشرتابه او ټولو غړو او همدارنګه په پارلماني چارو کې د دولت وزارت له همکارۍ او هلو ځلو د زړه له تله مننه کوي، چې دغه بې ساری ګام یې پورته کړ او دې مستحق قشر ته یې خپله ژمنتیا عملاً په اثبات ورسوله.
معلولیت لرونکي وګړي او د شهیدانو ورثه د ټولنې د نورو وګړو په څېر فوق العاده وړتیاوو څخه برخمن دي؛ برابرو حقونو، امکاناتو او اسانتیاوو ته اړتیا لري. دغه وزارت به د یوه ملي او انساني مسولیت او د مشرانو جرګې د باور پر بنسټ د دوی ټولو ستونزو ته د رسېدنې او حل لپاره هر کار وکړي، تر څو شته ستونزې حل او کارنده فرصتونه رامنځته کړي.
