د شهيدانو او معلولينو چارو په وزارت کې د مالي مدیریت معلوماتي سیسټم د لاښه والي په موخه مشورتي غونډه ترسره شوه
د ماليې وزارت څخه راغلي پلاوي د شهيدانو او معلولينو چارو وزارت د بودیجې او مالي چارو له آمرینو سره، په آفمس (د افغانستان مالي مدیریت معلوماتي سیسټم) کې د نویو بدلونونو د راوستلو او د دې وزارت د مالي برخې کارکوونکو ته د روزنیز ورکشاپ د دایرولو پر څرنګوالي مشورتي غونډه ترسره کړه.
یاد پلاوی د شهیدانو او معلولینو چارو وزارت د بودیجې او د مالي چارو له آمرینو څخه وغوښتل چې په آفمس سیسټم کې د نویو بدلونونو د تطبیق په برخه کې د مالیې وزارت له مسؤلینو سره بشپړه همکاري وکړي او خپل وړانديزونه او پوښتنې دې له اړوند مسؤلينو سره شریکې کړي.
همداراز، د مالیې وزارت پلاوي یادونه وکړه چې نوی آفمس سیسټم له نېکه مرغه، د مالیې وزارت اړوندو کارکوونکو لخوا جوړ شوی دی، تر دې مخکې، په مالیې وزارت کې د بهرنیو هیوادونو لخوا ډیزاین شوی آفمس سیسټم کارول کېده.
د یادونې وړ ده چې په آفمس سیسټم کې د نویو بدلونونو په پلي کيدو سره به، په مالي چارو کې د چټکتیا ترڅنګ لازمې اسانتیاوې هم رامنځته شي.
