د شهیدانو او معلولینو چارو سرپرست وزير د پیامبر اعظم پياوړتيا روغتيايي مرکز څخه لیدنه وکړه
د شهیدانو او معلولینو چارو سرپرست وزير د پیامبر اعظم پياوړتيا روغتيايي مرکز څخه لیدنه وکړه
نن دوشنبه، د کب په ۱۱مه، د شهیدانو او معلولینو چارو سرپرست وزير پوهنمل حمیدالله فاروقي د پيامبر اعظم پياوړتيا مرکز څخه لیدنه وکړه او د مراجعینو لپاره يې د خدمتونو چټکتیا او ناروغانو ته دې ښې پاملرنې په پار یې د مرکز له چارواکو ، ډاکټرانو او مراجعینو سره خبرې وکړې.
ددې مرکز څخه د ليدنې پر مهال له ښاغلي فاروقي سره د وزارت د نورو چارواکو ترڅنګ، د ملاتړ او خدمتونو وړاندې کوونکي معينيت مرستيالې جمیلې نورستانۍ هم شتون درلود.
ښاغلي فاروقي په داسې حال کې چې ددې مرکز مراجعينو ته يې د معیاري او مؤثره خدماتو وړاندې کولو باندې ټینګار کاوه وویل: د مرکز په عصري تجهیزاتو سمبالول مو کاري لومړيتوب دی او د متخصصو ډاکترانو ګومارنې او نورو روغتيايي برخو کې يې له عامې روغتيا وزارت سره د همغږۍ، همکارۍ زياتول او ګډ کار اړين وبلل.
ښاغلي فاروقي زياته کړه، چې ډاکټران باید د ټولو روغتيايي اصولو مطابق له ناروغانو سره ښه چلند وکړي او د هغوی ستونزو او درملنې ته پر وخت رسيدنه وکړي.
د پیامبر اعظم د پياوړتيا مرکز رییس ډاکټر فضل الله محمدي د مرکز د بېلا بېلو څانګو او ستونزو په تړاو ښاغلي فاروقي ته معلومات ورکړل وويل: اوس هم دغه مرکز د اورتوپيدي، عمومي داخلې، ذهني او رواني، فزيوتراپي، سترګو او غوږونو برخو کې متخصص ډاکتران نه لري او ددې تشې د ډکولو غوښتنه يې وکړه.
د نوموړي په خبره، چې هره ورځ دغه مرکز ته د تداوۍ په موخه لسګونه مراجعين راځي او د ناروغيو تر تشخیص وروسته ناروغان تر لازمې درملنې لاندې نيول کېږي.
په پای کې ښاغلي فاروقي د مرکز د چارواکو، ډاکترانو او مراجعينو د ستونزو، غوښتنو، نظرونو او وړانديزونو تر اوريدو وروسته ژمنه وکړه، چې ددې مرکز د خدمتونو وړاندې کولو د ښه والي او د متخصصينو ډاکترانو د ګومارنې په برخو کې به لازم کار او دوامداره هڅې وکړي.
________________________
