معلولیت لرونکي وګړي د نورو برخو تر څنګ د ورزشي ډګر اتلان هم دي
معلولیت لرونکي وګړي د نورو برخو تر څنګ د ورزشي ډګر اتلان هم دي
د شهیدانو او معلولینو په چارو کې د دولت وزارت د نظامي شهیدانو او معلولینو چارو د انسجام مرستیالې او د وزارت وارسي کوونکې صبري اندړ د معلولینو تر منځ د زونونو په کچه د پیل شویو سیالیو پایلوبه کې ګډون وکړ؛ د لوبې د نندارې تر څنګ یې د کرکټ معلولیت لرونکي لوبغاړي هم وستایل.
آغلې صبري اندړ خوښي وښوده، چې د نورو برخو تر څنګ ورزشي برخې په ځانګړې توګه کرکټ کې هم معلولینو ته د دوی د وړتیاوو څرګندولو زمینه برابره شوې ده. نوموړې د معلولینو د کرکټ ملي لوبډلې لاسته راوړنو ته په اشارې د کرکټ بورډ له رهبرۍ د دا ډول سیالیو د جوړولو له کبله مننه وکړه او هیله یې وښوده، چې په راتلونکې کې نوره پراختیا هم ورکړل شي.
آغلې صبري اندړ وویل، چې معلولیت لرونکي وګړي د ځانګړو وړتیاوو څخه برخمن دي او کولای شي د هېواد لپاره ښې لاسته راوړنې ولري، زیاته یې کړه: موږ د ورزش په ډګر کې داسې اتل ورزشکار معلولین لرو، چې په نړیوالو سیالو کې یې د هېواد لپاره د سرو زرو او برنزو مډالونه ګټلي دي، چې ویاړ یې د ټول ملت مشترک دی.
په پای کې آغلې اندړ ګټونکې لوبډلې ته د سیالیو د پایلوبې جام او مبارکي ورکړه او معلولینو سره یې د هر اړخیزې همکارۍ ژمنه وکړه.
د افغانستان کرکټ بورډ له لوري د شهید نجیب الله تره کي په نامه (د معلولیت لرونکو وګړو) د کرکټ دغه شل اوریزې سیالۍ د هېواد د پینځو زونونو تر منځ جوړې شوې وې، چې پایلوبه یې نن د سپین غر زون د معلولینو په ګټه پای ته ورسېده.
