د نظامي شهیدانو او معلولینو د تېرو کلونو پاتې حقوق به ورکړل شي
د نظامي شهیدانو او معلولینو د تېرو کلونو پاتې حقوق به ورکړل شي
د ننګرهار ولایت د نظامي شهیدانو او معلولینو یو شمېر وارثینو د شهیدانو او معلولینو په چارو کې د دولت وزیر ښاغلي لعل الدین آریوبي سره وکتل.
د یاد ولایت د نظامي شهیدانو او معلولینو ورثې د خپلو تېرو کلونو د پاتې حقوقو ترلاسه کولو د موضوع د شریکولو تر څنګ غوښتنه وکړه، چې د نظامي شهیدانو کورنیو او معلولینو ته په ټولو برخو کې پاملرنه زیاته او ستونزو ته یې پر وخت رسیدګي وشي.
ښاغلي آریوبي د هېواد او ملت د دفاع او ساتنې په برخه کې د نظامي شهیدانو او معلولینو قربانۍ وستایلې وویل، چې کورنیو ته یې رسیدګي د دولت مسولیت دی او د شهیدانو او معلولینو په چارو کې د دولت وزارت د یوه مسول بنسټ په توګه ژمن دی، چې د دوی د ستونزو د حل تر څنګ دوی ته ټولې اسانتیاوې او امکانات برابر کړي. ښاغلي آریوبي زیاته کړه، چې د نظامي شهیدانو او معلولینو د تېرو کلونو د پاتې حقوقو په اړه به دقیقه ارزونه ترسره او د اړتیا وړ بودیجې له برابرېدو وروسته به ټولو ته خپل حقوق ورکړل شي.
ښاغلي آریوبي څرګنده کړه، چې نظامي شهیدان او معلولین د دولت په لومړیتوب کې دي او دوی ته د حقوقو ورکړې سربېره د کارموندنې، اقتصادي پیاوړتیا، ورثې ته د زده کړو او اسانتیاوو برابرولو لپاره بنسټیز پلانونه جوړ او د تطبیق په موخه تر کار لاندې دي.
