د شهیدانو د ورثې او معلولینو د وثیقو او اسنادو سمونه او بیاکتنه د قانون پر بنسټ ترسره کېږي
د شهیدانو د ورثې او معلولینو د وثیقو او اسنادو سمونه او بیاکتنه د قانون پر بنسټ ترسره کېږي
د شهیدانو او معلولینو چارو سرپرست وزير پوهنمل حميدالله فاروقي د افغانستان د معلولینو سرتاسري شورا له رییس مسعود ساپي او غړو سره وکتل.
پوهنمل حمیدالله فاروقي له يادې شورا سره ختیځو ولایتونو ته د وروستي سفر د پایلو او لاسته راوړنو په اړه معلومات شريک کړل وويل: د معلولیت لرونکو وګړو پر وړاندې د ستونزو او ننګونو په پام کې نیولو سره، لازمه ده چې د دوی ټولې غوښتنې او اړتیاوې تشخيص شي او مناسبې حللارې ورته ولټول شي.
ښاغلي فاروقي څرګنده کړه، چې د معلولينو مدني بنسټونو په همکارۍ او ملاتړ سره موجوده ستونزې را کميدلی او له منځه تللی شي.
ښاغلي فاروقي همدارنګه د بریښنایي تذکرو په ترلاسه کولو، عامه پوهاوي په لوړولو او له وزارت سره د شورا د همغږۍ پر زياتولو ټینګار وکړ.
د افغانستان د معلولینو سرتاسري شورا رییس مسعود ساپي ختیځو ولایتونو ته د ښاغلي فاروقي وروستی سفر وستايه او د مننې ترڅنګ يې زياته کړه، چې وزارت ته په راتګ سره مو د شهیدانو ورثې او معلولینو ستونزو او وړاندیزونو ته په پوره حوصله مندۍ غوږ نيولی او د هغوی هر ډول نظر ته مو احترام کړی دی.
ښاغلي ساپي وويل: چې په دولتي او خصوصي ادارو کې د درې سلنه معلولينو ګومارل، زده کړو، د تخنيکي او حرفوي روزنې کچې ته وده ورکول، د سرپناه چمتو کول، روغتيا او د ژوند په نورو برخو کې د معلوليت لرونکو وګړو لپاره له ښاغلي فاروقي د ځانګړې پاملرنې غوښتنه وکړه.
ښاغلي ساپي دې ته په اشارې، چې معلولین د ټولنې ترټولو زیان منونکی قشر دی، لازمه ده چې د دولت او خلکو لخوا يې په ښه ډول ملاتړ وشي او دوی ته په ځانګړي احترام قايل شي.
د هغې وړانديزې طرحې چې له ۳۴ ولايتونو څخه معلولینو شورا ته را ليږلې وه، د يادې شورا مالي او اداري مرستيال ښاغلي داوود سيار لخوا ولوستل شوه او پکې د بروکراسۍ ختمولو، سيسټم جوړونې او د اسنادو له سمونې او ارزونې څخه ملاتړ شوی و.
د ناستې په پای کې د شهیدانو او معلولینو چارو وزير حمیدالله فاروقي د غونډې برخوالو نظرونو او وړاندیزونو ته لنډ ځواب ووایه او زیاته یې کړه، چې د شهیدانو ورثی او معلولینو ټول اسناد د قانون په چوکاټ کې کتل کیږي، څو وکولی شو جعلي او خیالي اسناد تشخيص او له سيسټم څخه پاک کړو.
د پوهنمل فاروقي په خبره چې، د معلولينو لپاره د کارموندنې، زده کړو او فزیکي لاسرسي مسلی مهمي دي او په دې برخه کې بنسټیز اقدامات شوي او د لا زياتې پاملرنې لپاره ورته اراده شتون لري.
