د شهیدانو د ورثې او معلولینو د اسنادو او وثیقو د څېړنې او ارزونې پر څرنګوالي بحث وشو
د شهیدانو د ورثې او معلولینو د اسنادو او وثیقو د څېړنې او ارزونې پر څرنګوالي بحث وشو
د شهیدانو او معلولینو چارو سرپرست وزیر پوهنمل حمیدالله فاروقي د سترې محکمې رییس او قاضی القضات قانونپوه سید یوسف حلیم سره وکتل.
ښاغلي فاروقي د شهیدانو د ورثې او معلولیت لرونکو وګړو د اسنادونو او وثیقو د څېړنې او ارزونې بهیر پر چټکتیا، د دواړو ادارو تر منځ پر همغږۍ او په یاد بهیر کې د حقوقي ستونزو پر حل هر اړخیز بحث او تاکید وکړ. دغه راز فساد سره د مبارزې او غیر قانوني اسنادو د ردولو برخه کې د ټاکل شوو کمېټو او سترې محکمې د قاضيانو د کړنو ستاینه وشوه. پر دې سربېره د شهیدانو د ورثې او معلولینو ستونزو ته د رسېدنې، حقوقو ورکړه کې چټکتیا او روڼتیا ټینګښت دواړو خواوو مشترک مسولیت وګڼل شو.
ښاغلي فاروقي زیاته کړه: یو شمېر اسناد، چې حقوقي ستونزې لري او بشپړ نه دي؛ د سترې محکمې د قاضیانو د لیکلي لارښود پر بنسټ به اړوندو ادارو ته واستول شي.
د سترې محکمې رییس او قاضي القضات قانونپوه سید یوسف حلیم د فساد پر وړاندې د شهیدانو معلولینو چارو وزارت کړنې او د اسنادونو او وثیقو د څېړنې او ارزونې کمېټو له وروستیو پرمختګونو ستاینه وکړه او د لوی شمیر ناقانونه اسنادونو ردیدل یې نیک ګام وباله. ښاغلي حلیم وویل: د سترې محکمې ټول قاضیان او اداري کارکوونکي هڅه کوي چې د څېړنې پروسه کې روڼتیا رامنځته کړي او ناقانونه اسنادونه باطل کړي. ښاغلي حلیم د همکارۍ ژمنه وکړه او زیاته یې کړه چې په مرکز او ولایتونو کې به ډېر ژر د څېړنې او ارزونې بهیر بشپړ شي.
