د شهیدانو او معلولینو چارو وزارت ټاکل شوي پلاوي په زابل ولایت كې د یاد وزارت د اړوند ریاست د فعالیتونو ارزونه وکړه
د شهیدانو او معلولینو چارو وزارت ټاکل شوی پلاوی د مالي او اداري چارو عمومي رئیس ښاغلي مولوي كلیم الله افغان تر مشرۍ لاندې چې هغې کې د شهیدانو او معلولینو چارو وزارت د مالي او حسابي رئیس ښاغلې قاري محمد امین درویش، د څارنې او ارزونې، د تفتیش او همدارنګه د بشري سرچینو ریاستونو استازي هم شتون لري، د یاد وزارت د سرپرست ښاغلي ملا عبدالمجید آخند د هدایت سره سم د دغه وزارت د اړوندوریاستونو د چارو د هر اړخیزې ارزونې او په ځانګړې توګه د بودیجې د شفاف او پر وخت مصرفولو د څرنګوالي په موخه د هېواد یو شمېر ولایتونو ته په سفر دي.
ياد هئیت په تېرو څو ورځو کې د لوګر، پکتيا، خوست، پکتيکا او زابل ولايتونو دشهیدانو او معلولینو چارو ریاستونو د فعاليتونه څخه ارزونه وکړه.
یاد پلاوي زابل ولایت ته خپل سفر په ترڅ کې د اړونده ریاست کارونه او فعالیتونه وڅیړل او همدارنګه د بودیجې د مصرف او لګولو پر چټکتیایې ټینګار وکړ. د پلاوي لومړنۍ موندنې ښيي، چې په یادو ولايتونو کې د بوديجې د لګولو بهير ډیر پرځنډ روان دې، چې د بوديجې د لګولو په لاره کې د پرتو خنډونو د لرې کولو په موخه ياد پلاوي د ریاست اړوندو مسئولینو ته د حل لارې چارې وړاندې کړې ترڅو د بودیجې د مصرفولو بهیر چټک شي.
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان د زابل ولایت د شهیدانو او معلولینو چارو ریاست د لیدنې په ترڅ کې د بودیجې په لګولو کې پر شفافیت او چټکتیا ټینګار وکړ، او د بودیجې مصروفولو پر وړاندې یې د شته ستونزو له منځه وړل د خپل سفر اصلي موخه وګڼله.
د زابل ولايت د شهيدانو او معلولينو چارو رئيس ښاغلي ملا عبدالحکيم دانش وویل؛ چې په دې رياست کې د بوديجې چټک او پر وخت لګول د دې رياست د کاري لومړيتوبونو څخه دي، خو په دې برخه کې يې شته ستونزې او ننګونې هم په ګوته کړې.
ښاغلي مولوي کلیم الله افغان د یاد ریاست د ستونزو او ننګونو له اوریدو وروسته د ستونزو د حل په موخه يې د زابل ولایت له والي ښاغلي الحاج ملا بسم الله عبدالله سره وکتل او د شهیدانو او معلولینو چارو ریاست پر مخ پرتې ستونزې او ننګونې د یاد ولایت له والي سره شریکې کړې.
په دې لیدنه کې د زابل والي ښاغلي ملا بسم الله عبدالله ژمنه وکړه، چې د اړونده ریاست ستونزې او ننګونې به په پام کې ونیسي او د حل په موخه به یې اقدام وکړي.
