د شهیدانو او معلولینو چارو وزارت مل پلاوي په سمنګان ولایت کې د دغه وزارت له اړوند ریاست څخه ارزونه وکړه
د شهیدانو او معلولینو چارو وزارت مل پلاوي چې په کې د مالي او اداري چارو عمومي رئیس مولوي کلیم الله افغان، د داخلي تفتیش رئیس مولوي احسان الله حقاني، د معلولینو چارو رئیس مولوي عبدالنافع منتفع او همدارنګه د ارزونې او څارنې ریاست استازی هم شامل دی، د سمنګان ولایت د شهیدانو او معلولینو چارو ریاست فعالیتونه او کړنې یې په هر اړخیزه توګه وارزولې.
نوموړي پلاوي د شهیدانو وارثینو او معلولیت لرونکو وګړو ته د حقوقو او امتیازاتو د ورکړې د څرنګوالي په هکله د یاد ریاست کارکوونکو ته لازمې لارښوونې وکړې او له هغوې څخه يې وغوښتل چې د دې اړمن قشر د حقوقو پر وخت د ورکړې په برخه کې جدي پاملرنه وکړي.
دغه راز د مالي او اداري چارو عمومي رئیس مولوي کليم الله افغان د نوموړي ریاست د ارزونې په ترڅ کې د اړوند ریاست له مسؤلينو وغوښتل، تر څو د بوديجې پر ځای لګولو په برخه کې عملي ګامونه پورته کړي او یاد رياست ته ځانګړې شوې بودیجه په شفافه او پر وخت مصرف کړي.
د شهیدانو او معلولینو چارو وزارت د داخلي تفتیش رئیس مولوي احسان الله حقاني هم په دې اړه خبرې وکړې او زیاته یې کړه: د یتیمانو او معلولینو د تثبیت پروسه باید د شهیدانو او معلولینو چارو وزارت د کړنلارې مطابق ترسره شي تر څو د تثبیت په پروسه کې د جعل او تذویر مخنيوی وشي.
د دغه وزارت د معلولینو چارو رئیس مولوي عبدالنافع منتفع هم د سمنګان ولایت د شهیدانو او معلولینو چارو ریاست کارکوونکو ته د غوره خدمتونو د وړاندې کولو په موخه لازمې لارښوونې وکړې.
د شهیدانو او معلولینو چارو وزارت د مالي او اداري چارو عمومي رئیس سره راغلي پلاوي د معلولینو او یتیمانو د تثبیت په پروسه کې د روڼتیا د معلومولو او همدارنګه د طرحې سره سم د هغوی د حقوقو د ورکړې په برخه کې له یو شمېر یتیمانو او معلولیت لرونکو وګړو سره له نږدې وکتل او د هغوې څخه یې د شهیدانو وارثینو او معلولینو ته د خدمتونو د وړاندې کولو د څرنګوالي په اړه پوښتنې وکړې.
په پام کې ده چې د شهیدانو او معلولینو چارو وزارت مل پلاوی به د بلخ، سرپل او کندز ولايتونو کې د دغه وزارت له اړوندو رياستونو څخه څېړنه او ارزونه وکړي.
