د شهیدانو او معلولینو چارو وزارت سرپرست وزیر محترم الحاج ملا عبدالمجید آخند د پروان ولایت له والي سره وکتل
د شهیدانو او معلولینو چارو وزارت سرپرست وزیر محترم الحاج ملا عبدالمجید آخند د پروان ولایت له والي محترم مفتي محمد ادریس انوري سره په خپل کاري دفتر کې وکتل، په دې کتنه کې د شهیدانو ورثه وو او معلولینو د وضعیت اړوند او د یاد قشر لپاره د غوره خدمتونو وړاندې کولو پر څرنګوالي خبرې وشوې.
همداراز د شهیدانو او معلولینو چارو وزارت سرپرست وزیر محترم الحاج ملا عبدالمجید آخند د ننګرهار، پروان، لغمان او سمنګان ولایتونو د شهیدانو او معلولینو چارو له رئیسانو سره هم جلا لیدنه وکړه، په دې لیدنه کې محترم وزیر صاحب د یادو ولایتونو د شهیدانو او معلولینو چارو ریاستونو له لوري ترسره شوي فعالیتونه او کړنې وستایلې او د رئیسانو څخه یې یتیمانو، کونډو او معلولینو ته د ښو خدمتونو وړاندې کولو په پار مننه وکړه، او هغوی ته یې لارښوونه وکړه چې سپارل شوي مسؤلیتونه په ښه اخلاص، پوره صداقت او ایماندارۍ سره ترسره کړي تر څو د شهیدانو کورنیو او معلولینو ته اړین خدمتونه په ښه توګه ورسول شي.
همدارنګه د شهیدانو او معلولینو چارو وزارت سرپرست وزیر په حضور کې د معلولینو لپاره د ځانګړي شوي نغدي مساعدتونو د وېش په موخه قرعه کشي هم ترسره شوه، چې په پایله کې د (۶۵)تنو معلولینو نومونه بریالي اعلان شول، او هر مستحق معلول به یوه اندازه دنغدي مساعدت په توګه ترلاسه کړي.
