د شهیدانو او معلولینو چارو وزارت سرپرست وزير محترم الحاج ملا عبدالمجید آخند د کاپيسا ولایت له والي سره وکتل
د شهیدانو او معلولینو چارو وزارت سرپرست وزیر محترم الحاج ملا عبدالمجید آخند په خپل کاري دفتر کې د کاپیسا ولايت له والي محترم قاري بریال سره وکتل، د دې کتنې پر مهال د شهيدانو او معلولينو چارو مرستیال محترم شیخ صاحب عبدالحکیم حقاني، د دفتر رئيس محترم مولوي شاه محمد دوست هم حضور درلود.
په دې لیدنه کې د نورو موضوعاتو ترڅنګ په درناوي سره د سپېڅلو شهیدانو او معلولینو د سرښندنو او قربانیو یادونه وشوه.
د دې لیدنې اصلي موخه هم د محترم وزیر صاحب عیادت، احوالپرسي او د هغه د روغتیا او ښه صحتمندي لپاره دعا وه.
همداراز د شهیدانو او معلولینو چارو مرستیال محترم شیخ صاحب عبدالحکیم حقاني د کاپیسا ولايت له والي سره په جلا لیدنه کې د تېرو شلو کلونو د جهاد په ډګر کې د کاپیسا ولایت د خلکو د بې دریغه هڅو، قربانېو او ویاړلو کارنامو یادونه وکړه او زیاته یې کړه: د کاپیسا ولایت خلکو د وطن په ساتنه کې د پراخو قربانیو په ورکولو سره د تاریخ په پاڼو کې د تل لپاره خپل نومونه ثبت کړل.
محترم شیخ صاحب په دې کتنه کې همداراز د جهاد په دوره کې او هم په اوسني وخت کې د کاپیسا ولایت د والي د نه ستړی کېدونکو خدمتونو او هڅو ستاینه وکړه.
په ورته وخت کې د کاپيسا ولایت والي محترم قاري بریال د شهیدانو د قربانیو د یادونې تر څنګ ټینګار وکړ چې باید د دوی قربانۍ هیڅکله هېرې نه شي. نوموړي همداراز وویل چې دا د خوښۍ او ویاړ ځای دی چې د خلکو او د اسلامي امارت نظام په چوکاټ کې خدمت کوو.
